آها آها ع الفكاهة

[center]الفكاهة:آها آها

الفكاهة ؟

ما شي ها ها ها

الفكاهة : حداقة و
نباهة

و كاين اللي بداها
ما عرفنا منين جاها؟

و الفكاهي ؟

ما شي هي هي هي

الفكاهي : كلامو باهي

ك ينبه الساهي

ف طريق معوج

و يفيق الفاهي

يلغى و يفوج

يشرح القلوب

و يخفف الحمل ع المغلوب

ف كل كلمة حكمة

و ضرب ل مثل

ل شي وذان نغمة

و جواب لمن سال

و ل شي فوام بسمة

تزين الحال و تزرع
الأمل

و ل شي وجاه

( منين جاهم الجاه)

عشقناها تكمة

عكدناها لكمة

و ضربة قاضية

ياك ما ؟ نرشو الما

نفكو القضية

باش ما

و شكون قال ؟

و كوميكيا
واش من كوميكيا

وا نوض يا

واش الذوق اللي بسال؟

و لا الهزل:أصابه
الهزال ؟

ضحكوا لينا غ الأطفال
و محال ...

الضحك ثقالة
الضحك رسالة

ما توصلو غير حمامة
زجالة

هايمة جوالة

توريك شكون وحل

و فين وحل

و تلمح للحل

لكل حالة

و ماشي من والى

ينز نوالة

هرني باش نضحك :

ما جد
ما هزل: هاذيك مهزلة

و آنا غ ندير الكالة

واخا الكلام ما زال ما
سالى

محمد حلوبي - آسفي

[/center]