حسبوني نمرة من النوامر

[center]حسبوني نمرة

حسبوني نمرة من النوامر

كتبوني ب قلم الرصاص

حسبوني نمرة من النوامر

وكملو بيا الخصاص

حسبوني نمرة من النوامر

ما تفيقو بيا ولا تنوضو

حسبوني نمرة من النوامر

غير شدو
بيا الوضو

ما تحزموني

ماترزموني

ما تعولو عليا

إلى بكيتو

ما نكون دمعاتكم

إلى تغربتو

مانكون أوطانكم

إلى حاربتو

مانكون سلاحكم

و إلى متو

ما نكون كفانكم

أنا غير بياع كلام

ما نعشق غير المعاني

ما نعاشر غير الحروف

اليوم ف فراشي الكاف

غدا يمكن تكون اللام

و فارقني يا خيالي

بعد مني

وإلى قديتي

غيرسبقني

شوف ليك طريق

غير طريقي

أنا إلى ركبت همي

نسرجو مزيان

نقاد ليه اللجام

و
نتمنى صادق

إلى مارجعني اللور

يزيد بيا للقدام

أنا إلى عصرت عمري

نعصرو عصرات

نرشف منو

رشفات على رشفات

نزيد نرشق

حتى
يدوخني دوخات

و نشد الارض

ونرتاح…….. نرتاح

أنا إلى عييت ونعست

نمدد حلامي

على قد
رجلى

ما
نحلم ب جنة

ما نعانق حوريات

ما نطير مع طيور

ما نعرج ف سماوات

[/center]