البرية
كل من سولتو
يكول غير مع الوقت
والوقت داير بنا
يرسم يامنا
بالموري
هاد الموري حلوف
خرب كل جميل وغالي
فجناين المحبة
ما خلا حتى شي
فرس كلشي
وزاد دورة
والساعة منخورة
بلون الحكرة
قرى ول ما تقرى
تبدلت النبرة
وصفارت النظرة
فعيور الناس
غسلت قلوبها
من كل إحساس
غير مع الوقت
واليد ضريرة
ما بقات موالفة
تلفت بين صباعها
كلها وغزيلو
جبد انت جبد أنا
واليد تعطبات
ما بقات كادة تتحرك
سكنت لمكان
اللي كان فيه الغول معشش
والغول داير حالة
من جد لجد
رجع الخوف سلالة
بلا ما تتعدب دير وكالة
نفس الحالة
واليد مسكينة
من برا زاهية
أو من داخل غبينة
لوان الظلم
فيها دفينة
وشكون فينا
اللي يهز الراس
ويكول لا بلا قياس
ينبت الإحساس من جديد
واليد تتحرك
والبركة تزيد
يرجع العز فقلوبنا تقليد
والفرحة تجي طالة
من فوق الروس
تعمر الدنيا بالحرية
لكل واحد
فيكم أنا كتبت
وكلامي ليكم برية
فتحو وقراو
ولا تنساوشي اليد اللي بي
واللي عليها كلامي
نقشتو فعينيا
نتمني يوصل ويدير مزية
العاهد نعطيوا
ويرجع تربية
لولادنا بالحق مغنية
يتعلمو حب اليد
اللي كانت ومزال سخية
عبد العالي الوالي ميسور 2013/04/07
