الزيارة
انا مرة اخرى خرجت من سكاتي
وقلت ارفع لآذانكم همساتي
باش تشاركوني اقوى لحظاتي
اللي حاملاها لكم مع الف قبلة مقالاتي
صباح الجمعة دقيت على اميمتي
القيتها وحيدة حيرتها اكثر من حيرتي
مهمومة تساؤلتها اشد من تساؤلاتي
قلت امي نمشيو نزورو الا بغيتي
قالت نيت هادا شحال ما زرت يابنتي
في السيارة سمعتها حمداوية وستاتي
قلت هاذ الخرجة زادت راحتها و راحتي
تمنيت الطريق يطوال يا خواتي
حتى نشوف ضحكتها وتزيد فرحتي
فالمقبرة من اول خطوة دفنت ضحكاتي
على قبر المرحوم كان سكاتها وسكاتي
تندعي ، سمعت انفاسها تبدلات نبراتي
انظرت لوجهها نزلات دمعاتي
قلت نتشجع قدامها فضحاتني اهاتي
بعد ما ظنيت نخفف بزيارتها وزيارتي
رجعتها لبيتها وانامشيت لبيتي
هي احناها هم فراق المرحوم وهم الآتي
وانا هم فراقو وهم وحدانيتها لعبو بذاتي
جميلة جبوري
26/05/2013
[b]
