التلفة ...
قلبي مسكين ساكن جنبي
كيحكلي عل يام تعبي
والزهر زغبي
جاني تالف بين الرجلين
نحتاج وقفة
نراجع بها هاد التلفة
وفكرة مكتفة
فكفوف الزمان تنين
من لهيه خايفة
عل دروب واقفة
تحكي هاتفة
نظرات فالعين
والكلمة فاهمة
فهمومي عايمة
غمة دايمة
رافدة قلبي فالكف جنين
ولادة يا ولفي ولادة
الهمة عل الصدر كلادة
والعز سرو فالقيادة
جاي من راس العين .
...
والتلفة واقفة
فيها لحلام مخالفة
والمحنة زاحفة
غطات ضو فالسما لاح
زاد صفحة فكتاب لجراح
الحرف عي من ديك الوقفة
والعين ضاعت فظلام الشوفة
والكلمة من عاهد العز مخطوفة
ملي كان الخط سيف والسطر وضاح
فيه اللام والميم والتا مربوطة سلاح
كاع الربيع فجنبو حافة
والامان حروفو خوافة
رد بالك من ديك الواقفة
كيضيعو فيديها لصلاح
وحوايج شلة ما يبق ما يصلاح .
...
يا خوفي مني وإلى جيت بكري
كا يكولو الفياق بكري
بالدهب مشري
وانا عيني ما شافت نوم
ضاع فزلات الزمان المسموم
كولو معاي
يمكن تبر الحكاية
ونصيب فيها دواي
نفتح السر اللي كان مختوم
وسوايع الهنا تجاور المكلوم
را الخوف ول سلالة
والسوايع تصبغت بالجهالة
والقيل والقال عل الفراق عوالة
ترسم بسواد الليل اللوم
والعيب حصد لامة القوم.
عبدالعالي الوالي 2013/05/26
