الطاقيا..شلال عطر
مللي المرحوم وافاتو المنيا
واتجبد جثة هامدة فالولايا*
عيطو عليكم وعيطو اعليا
تهزينا واتحطينا بهاد البليا
ودّعناه وقرينا عليه شحال من آيا
غطيناه زولنا ليه السباط والطاقيا
بدات تدوز من يد ليد حتى وصلات ليا
قلت ليكم اعطيوها ليا
خديتها وكانت احسن هديا
كان الله يرحمو رمزو هوالطاقيا
رمز الهمة العاليا
رمز الناس الاثقيا
رمز الشرفا والاوليا
حافظت عليها وكأَنها قطعة ذهبيا
مللي الايام تقسى عليا
اولا شوقو يهوج عليا
نقبلها وكاني قبلت ديك الإدِّيا
شلال عطرو يتكب عليا
ياخدني ويسافر بيا
يمثل لي وكانو حدايا
يرجعني لايام صْبَايا
ايّام سعدي وهنايا
ايام نرقص ويفرح بيا
ايام نبكيي ويدافع عليا
عنداكم تنساو الجنوب قال عليا
احساس رقيق جابدني ليه وجابدو ليّا
مللي انا صغيرة بنيّا
وحتى ملِّي ولا عندي الدرِّي والدرِّيا
الله يحسن ليه كما احسن فالدنيا
جميلة جبوري
28/04/2013 à 20h00
* :المرحوم وافاه اجله في ولاية امن مراكش. بعدما شوفي من مرض دام سنة، استرجع كامل قواه وذهب لتجديد بطاقته الشخصية.
