"مشات ايامكم ا با حنيني"
با حنيني يا با حنيني
مشات ايامكم ا با حنيني
ﯕول هاد المرا عندي تهنيني
راه قتلاتني بالبيض و بانيني
ما تعرف تطيب ما تعرف تصبن
غير تاكل وتصرط و تمشي تنيني !!!
**************
و ناري ناري ا با حنيني ال دارت الغدا كديرو مسوس
كرشي طابت هلكها البوكاديوس
ديرها كوجهها وضحك وجهها بحال العتروس
و ﯕولي ا باحنيني اش هاد الزهر المنحوس؟
*************
و با حنيني و فرق كبير بينها و بين جدة
نجي من الخدمة منلقى لا شهيوات لا غدا
عاطياها غير النعاس ديما معنﯕة المخدة
وجيبو لي شزرواطة نقاد ليها ضلوعها ولا شي مقدة
***********
عندي مرا سطل بلا تقرقيب
هانتا تشوف صغير انا و راسي بسبابها عمر شيب
دارت في العصب وفلوسي كاملة مشات دوا داها الطبيب
وتجيب لي التمام ا با حنيني,و طيحني كاو ا با حنيني
ملي تقولي صافي صافي ا الحبيب
*********
و سعداتك ا با حنيني في زمانكم ما كان لا انترنيت لا فايسبوك
و تزوجت بالشات ا وحلت فيها دروك
شلا حقوق شلا واجبات لمدرتيهمش تعيط ليك على هادوك
دوز الحبس و تخلص النفقة و يتخلى دار بوك
********
جيتك ا با حنيني بغيتك لهمي تنسيني
و تعاود لي على الزمان لي كنتي فيه حاكم
كانت جدة مسكينة ﯕلتي لي تخاف غير
من داك الموسطاش بو الشلاغم
جبتي زينة العيالات صداقها جوج ريالات
نيتها صافية ربي لي بيها عالم
و انا الفلوس طبات و الشكارة خوات
و جبت مرا دارت لي الحلاقم
********
عاود لي ا باحنيني على جدة
نهار توحمت ليك على الرفيسة العمية بالخبز الكارم
عاود لي على النهار لي توحمات ليك فيه
على الكرموس الهندي وكانت الفضيحة
مشات فيها هي وانت و عمي سالم
اليوم وحم المرا صعيب,ميزانية,توحم على الفريز وفريخات الحمام
والانناص بغات منو عرارم
ملي تجيب ليها كلشي تبقى تشوف فيه
راني دخت والله مبقايت فاهم
********
خلينا خلينا يا با حنيني من صداع العيالات
و عاود لي على زمانك زمان العز و ديك الليامات
عاود لي على زمان النية والرجلة والكلمة والحشمة لي زمانها فات
اليوم مشات الحلاوة والموضة دارت الحموضة
شفتي ابا حنيني ايامنا كيف ولات؟؟؟!!!
**********
عاود لي على مدينة اسفي والخير فيها لي كان
عاود لي على البحري في القديم لي كانت عندو قيمة و شان
خيرنا صدروه البراني والبحري اليوم كعاني غلبو هاد الزمان
و السردين دار ﯕرون صدروه للسبليون والمسكين بق جيعان
محمد لبزيز(اسفي)
زجال وكاتب كلمات اغاني
الهاتف 0669356456
بتاريخ 19/07/2013
