"ولد فلان؟؟!!!
نقدم ليكم نفسي انا ولد فلان
فلوسي كثيرة رجعتني راجل مزيان
وخا انا من الداخل مافي لا رحمة لا حنان
كلشي يحترمني ويقدرني و كبر لي الشان
************
اييه ﯕالو الفلوس كدير الطريق في البحر
راه بسبابها وليت كنعبر و كنهضر
لكن ماشي حلال غير مكحلها على لمجر
ندير غير المصايب و نضحك بوجهي احمر
*********
في الادارات انا ما ندير الصف
غير تليفون نقضي غرضي بالخف
بنادم ملي يشوفني يولي يقفقف
ولي سخن عليه راسو نولي نضرب و نشتف
********
ولد فلان نشري الضمير بالمليون
نستغل السلطة والنفوذ و نخالف القانون
نستغل مقالع الرمال و نجمع المال لي بيه مجنون
منتحاكم منتشد في الحبس وخا يكون لي يكون
***********
ولد فلان فلوسي حرام سرقة رشوة كوكايين و حشيش
كنتعدى ونتكرفص على الدرويش
نخدم بيه وندمر بيه وعلى ضهرو نعيش
تمشي ليه الصحة ولا يموت انا ميهمنيش
***********
هيمتا يولي ولد فلان بحالو بحال المواطن العادي؟
نفس الحقوق و الواجبات يتحاكم قدام القاضي
اليزم باعلى صوت انا والمغاربة كننادي
راه هاد اولاد فلان خرجو على بلادي
محمد لبزيز(اسفي)
زجال و كاتب كلمات اغاني
الهاتف 0669356456
