العاهد
عاشق مسكين ضارت به كلمة
تسبليه بعيونها
عروبي قاتلاه الحشمة
قال فحنين
راعي لا تجوري يا الدهمة
ستري عراضي
أنت للأصول فاهمة
روحي روحي خلي الدنيا بالهنا سالمة
روحي روحي بكاي اللي انت به حالمة
ولف السكات وانت به هايمة
شارد فدهول بين الحرقة والتخميمة
ضيع الكول(القول) وذبالت فشفايفوا التبسيمة
ضيع الكول والحروف صارت سقيمة
يا حروف الكلمة المسكينة
عارف النغمة فيكم بنينة
وتار عقلي تقطعت والنبرة ما بقات حنينة
هربت للتسع الهروب في د الزمان يمنع
لفيت لساني فكتان بيض مرصع
بالخيبة والهم المكردع
ولوايع حارة كتقطع
جناني صفار بان عليه ليبوس
ضاع النوار م الورق مسيوس
ضاعت الجدبة
ضاع الهواس
ضاع التشطين فعقل التراس
هو والكلمة لعبو حابة
ضحكو كنير فسهب الدعابة
ولفو المزاح وسعو القشابة
شعلو شميعة بالنور جدابة
تحداو كثير خوف الغابة
فرحو وبكاو
مدحو وهجاو
ما نساو حتى شي
تطرطق الفرشي
وعقل فاشي هرس الحق فقلب الكلمة
و تلف التراس فدروب الظلمة
روحي روحي خلي الدنيا بالهنا سالمة
روحي روحي بكاي اللي انت بيه حالمة
...
نطقت الغالية الكلمة
والزفرة تنطح الزفرة
منين طاحت عليك د الحشمة
شكون كال (قال)العشق يكون بالسترة
ياك عشقنا طير حر
غرد فكل مكان
بيه الناس تهضر القوافي والميزان
نسيتي دخولنا للغابة / تحدينا الليل وديابو
ما خوفتنا الظلمة / ولا نبيح كلابو
نسيتي النور السايل من عيون الشمعة
وسهيرنا بسبابو
نسيتي العاهد اللي جرينا فرحابو
حلمنا كثير حتى الحلم طابو جنابو
نسيتي كل ما بنينا وقسينا فعدابو
حزت عليك أو هملتني
سبلت بالعين ما عبرتني
درت راسك عروبي وكسيت الخوف بالحشمة
يوقفلك العار ودنوبي
كنت ناطقة ورديتني بكمة
يوقفلك العار وذنوبي
كنت حية ودفنتني فالظلمة
...
تهجهج المجذوب وثار
يكف ...يكف يا لالة أنا ما نسيت
هم الدنيا كلاني و رشيت
أحياني والقلب ما هن
خاويت الصمت وغبني غبنة
هربت وهروبي زادني محنة
أجيني يا الكلمة جاهرة/ بالسر وحكي عل اللي صار
بوحي الحقيقة ظاهرة/ فيها العقل ياك احتار
يا نجمة عليك الناس صاهرة/ يطف الليل ويشعل النهار
بالأمل راها صابرة/ زمان هدا أو طال المشوار
أجيني يالالة يازينت الحروف
نفش غدايد المحكور
وحتى لقلم مسكين ملهوف
بمدادو ينور لسطور
يعانق الورقة بكفوف
أجيني يالالة نهرس شوكة الخلعة
تزيان الصنعة ونداوي هم المشطون
أنا وأنت فبلادي
هداك أو هادي ونعريوا عل السر المخزون
يضيع سهادي
ويحل يالالة تنشادي شوقي شوق المغبون
حركاتو شوفة
والنوبة معروفة كل واحد تجيه بلون
وأنا يا أهلي مبلي
ياك وطني فعقلي بيه تعمر المكنون
يالالة يا خيتي
وانت مليحة
طابعاك التسريحة رفاكة نتسراو فكل مكان
من الجدر نعريوا عل القبيحة
تجي البذرة طالعة فصيحة
تكبر وتزهر تعطي الأمان
أجيني يا الوردة نعمر بيك جناين العقول
تبها وتخضار وتجي بحلول
تفك عقدة الليل وديابوا
يكبرلي الشان نلق خديمة فبلادي
نرفع راسي مزيان
ونكول(نقول)ياسعدي بخير بلادي
يفرحوا البنات أو لولاد
بيهم يكمل مرادي
يا كليمة سقيني
عفاك لا تخليني
الحروف بنينة تشفي المهبول
أجيني يا الكلمة جاهرة بالسر/ وحكي عل اللي صار
يا نجمة عليك الناس صاهرة/ يطف الليل ويشعل النهار
عبد العالي الوالي ميسور
[/size]
