الفكرة

موضوع: الفكرة الثلاثاء ديسمبر 10, 2013 6:32 pm

الفكرة

جاتني فكرة تدق
فتح عقلي الباب
لقيت دموعها تسيل
...
فكرت حتى عييت
والعقل تراب
فيه نبتت الفكرة
...
الدموع عين صافية
تروي التراب
الصح اللي جاب
...
حطيت الفكرة فكف الورقة
نسات التراب
المداد من القلم هارب
طامع فالفكرة
...
كتبها فالحلم
ضاع النوم... من عين العقل
فيقاتو لشواق
...
كتبها حروف
سلمات الكلمة وراق السعد
اللي داتو الفكرة
...
بدلت النظر
فصلتها توب جديد
يجي مع الوقت
...
يجي عاصر
يجي مزير
يجي نافخ من كلبو الزهر
...
سرحات مع الوقت
بنت الوقت
نسات العشرة
نسات التراب
اللي فيه نبتت
...
عاودت الحساب
عاودت الحرث
وزرعت من جديد
...
هاد المرة بذرة
ما تخون العشرة
طغست عروقها فالتراب
عنكاتو.. قبلها
على الجبين كي ولات..
تمرة ..
تَقْطعْ الصيام
تجي صلاتو فرحانة
مخشعة من الغرام
...
جمرة ...
إلى كواتك تْبْر َ
من برد الخوف
المعشش فالركابي
...
تطربك ..
تهنيك ...
تحنِّي ألْيَام بالمعنى
...
تجي انت عريس
فوق الكلمة
يفرحو الحروف
اللِّي تْوَلدو فحضان الفكرة
عبدالعالي الوالي 2013/11/19