تحلات الظفيرة
تحلات الظفيرة ...
اللي كانت شادة العاهد ...
وبقينا منشرين ...
الريح اللي جا يبهدلنا ... يعرينا مليح
...
كتبنا حروف تجمعنا ...
تسنينا الربيع ...
جانا الخريف زاد ف عرانا ...
ما شبعنا ... ما شفنا الهنا ...
ما باين لي هاد الغمة تنزاح
...
كثر الحجا علينا ...
عاد جينا ...
فين المرسى اللي يقبل علينا
فين حنا من جهة الحياة ...
ول جهة الدفينة
...
ياك الحروف كانت رهينة ...
فديك لفام اللي كانت ملجمة
كانت فوسط الكلمة محرومة ...
واش يمكن تكون ليوم ملغومة ...
واش نقبل ...واش نصدق ...
واش ندس حروفي فالمحال...
نسد باب تحل فجوفي ...
ما بق ما يتكال ...يا حروفي .
...
يا حسرة علي ...
جيتني فرحان من ديك القصيدة ...
جيتني فرحان من ديك الحبسة ...
اللي فكت الكلام من ديك التبكيمة
...
جيتني حلم فوسط كلمة ...
دساه من صغري ...
ملي كنت أنا ... هو أنا
ملي كانت البسمة تكتب رجانا
...
واش نكفني بحرفي والقبر كلمة
ول نكشفني لضو النهار من ديك الحلمة
ول تموت النشدة فالهزار... والقاتل حنا.
...
عاري على الحروف رميتو
واقف ف باب القصيدة
باغي نزور ... نتنفع ول نبور
ول نبخر داك الرجا ...اللي تولد فالصغر
نسلم قلبي للحجر ... يطفي سر المحبة
يطفي سرنا ...
داك السؤال اللي حير جدودنا ف الحرف
...
درت داك الحرف ..هاد الحرف
كتف نعريه للزمان
نحرتو ... نورتو بقوافيه ...
وفيه مرسومة البسمة اللي كانت طابعة ماليه
تنشر كتاب كبير
فالقلب عامر إحساس
وواحد فالعقل كلو تدبير
مابق ما يتكال ... يا حروفي .
...
حيرني سؤال
بغ ينتفني ... من حال الجدبة
من ديك العتبة ... اللي تزوقات بالحرف
بغ يمسحني من حلمي اللي تساس
فقلب داك التراس اللي كنت أنا
...
حيرني حال كواه المحال
وبق ف د الزمان رهينة
ما يكفينا غي الحرف اللي يقبل علينا
فيه صمتنا ...فيه غنينا ... فيه حلمنا
فيه بكينا ... مدحناوهجينا ...
هاد الحرف وحدو عارف ما بنا .
عبدالعالي الوالي
