[rtl]إلى تسمعني ...[/rtl]
[rtl] [/rtl]
[rtl]دويت عليك
يا الساكن قلب الحروف
داير ف الحس عجاجة
محرك الرْحَى
دايرة بالزمان المكفوف
تعصر حالنا
فكفوف المرجة
عفَّن
وتكفن بوسخ التراب
ما قبل القبر عليه
ما يقدر يطل على الدنيا
من شوفة العين
ما قدرنا نرميو العار
على الزمان يعفو عليه
هاد الحال نار
وتحركْنا به
رمادنا ف مركب الريح
معنكْ الوقت
وهي تلوح فيه
صاطتو للبحر
يمكن الماج تقبل عليه
زهرْ...
الزهر كَمْشة
كلشي معول عليه
الموجة حرشة
هازة كْنافرها فوق راسها
اللِّي كلمها تعض فيه
تقجو من كْفاه
غدر...
لهاد الزمان برية
محرزة ف وراق العشق
اللِّي تيتمت بكري
تَلْفات طريق الصواب
فدروب التيه
عوجة ليام
مكحلة بشطنتنا الهبيلة
قطعات القبيلة من الحزام
تسرمت اللامة
اللِّي كانت جامعة رحبتنا
ف زحام الوقت
كلاها دريز الدنيا
وطَّها ف الغر
وكثر...
جربت نشوفني
من عين حالي
لقيتني كْبالي حاير
نفتش عليَّ
باقي ما جيت من لهيه
فين كتاب يتحَلو عينيَّ
غوت فوجه الدنيا
يمكن تقيلْني
بغيت نكْلع الخوف من البَدْية
وخوفي كان من الخوف بَدْية
لاصق فيَّ
حالي مسرج عَوْدُ
بالحافر يدك
على ظهر زماني
حالي من كناش الحال
ورقة فيها رسمني
كنشوفني شريط
وجه الزمان مسحتو
وضْوَ ..
كَالي خزيت
وأنا باقي ما كلمتو
لاحلي كلمة حجرة
هرست الحجاية
ما بقات تقبل شكايا
سال دم الوقت
من ديك لجراح البكَّاية
هزيت شقايا بين يديَّ
ودرتني ف كُمِّي
باش تمَّ ننساني [/rtl]
[rtl]عبدالعالي الوالي [/rtl]
