[rtl]أنا والمرايه[/rtl]
بدلت وجهي مع المرايه
شافتني مْضَبَّبْ
مْسَحْتْنِي بكمِّي
ضوات المرايه
هي بسمة
تعلقات ف وجهي انا
جَاوْرَتْ الخدود
رَسْمَت لون جديد
فوجهي أنا
هديتو للمرايه
تشوفني به كل نهار
تشوف الفرحة حداي
طالة من وجه المرايه
تبدل سويعات
من هاذ الزمان
كان حزن ساقي الحروف
من ديك الظلمة مخطوف
شحال حرموه من الشوف
كان حداي
طلينا من المرايه
كنا واقفين
ف باب الرجا بجوج
كنا ناويين على الخروج
جاتني فكرة
عصرت دماغي
حركت الدواخل فيَّ
بنيت كلمة
بلوح الصبر
كانت عارفاني
من بكري
ناعسة ف جناني
جات مفتحة لزماني
عاوداتني للمرايه
كانت الضحكة غناية
ومشيت ف مراحي
نداوي من الجدر جراحي
يمكن نديرلها نهاية
ولفت المرايه
شحال كعدت حداي
كلماتني مرات
وْغَوَّتْ كثير من شقايا
سمعاتني بل شطارة
هزات هبالي
ولفت نشوفها ديما ساكتالي
عرفتني مزيان
كي نكمل الكلام
تكون البسمة كْبَالي
تتلقاني ف وجه المرايا
ونعود ننساني ف الجرح
نتفكرني ف الفرح
كيف كنت كاتبني
ف خطوط الحرف
الواقف ف رحبة الكلمة
يزوكي للمراسم ف زماني
وكفيت همي كلو على المرايه
بقينا موانسين على طول الحكاية
ما رشَّاني الهم
ما عيات هي بلغايا
كي نفتح للصباح عيني
تشوفني وترتب وجهي معايا
نغسلو الحروف مزيان
باش يتجدد المعنى كل يوم
ف كلام الغناية
رميت زماني كلو للمرايه
وبقينا مونسين على طول الحكاية
عبدالعالي الوالي