كناش الزهر ...
بدر بدر بدر
طال من قبة لفجر
هضر هضر هضر
من كال يقدر
نعطيه كفي
ونزيدو لعمر
يكسر
صلابة الحجر
يكسر شوكة لغدر
يكسر حيوط الشر
من كال يقدر
نعطيه فاس
والزمان ضامن
يحفر على الحقد من الجدر
يحفر على النفاق
من عطفة ف الظهر
من كال يقدر
نعطيه روحي فوق الروح
ونزيدو وْقَيْتِينْ من المحبة
يوريني زريعة الصفا ف الصدر
يوريني شحال من روح
طلقات الدنيا ساعة الفجر
يوريني مراسم البسمة
ف كفوف الليل
وكيف يمكن للوقت تنور
كناش الزهر
مدغني
لاحني من فمو
وشكون يعاود فيَّ الصبر
يرسمو بلون جديد
يعيد فيه النظر
شكون يلمني
يطفي حريق
يقصر الطريق
نوصل خلاص لباب
مفتاحو تبرد ف السر
يفتحني
يقراني
عنوان جديد
مكتوب ف راس العمر
صفحة بيضة
على الحب شهيدة
على الحق شديدة
نبني الروح بالصفا(ء)
لوح فوق اللوح
حتى خطوط الورقة تعمر
نشوفني ف وجه القصيدة
حروف
كل حرف في يسطر
دمو حامي
يغني
ما يبكي
يحكي
ما يشكي
يهضر يهضر يهضر
يسل من كل كلمة شوكة
يرسم طريق مسكدة
يخطفها من لوعر
يسقي بذور جات
ف وقت البهات
يطفي النار الساكنة ف الحر
كناش الزهر
ليوم
عاد بديت نفهم
عاد قريت لغازو
اللي عليه حازو
مخطوف
من قلب الحلم
من وسط الرجا(ء)
قالو بان
قالو كان
قالو بشحال
عاد تصدق ف جنان العمر
بذرة الزهر
عاد تطل ب الصدق
عيون البدر
نكحلو عيون الظلمة بضو الفجر
ف كفوف النهار تنور
كناش الزهر
قريتو
عطيتو
سرقلي لعمر
عبدالعالي الوالي
