هكذا القلم
هكذا الدواية
نزمم جرحي وعليه ما نندم
بعد ما نكتبوا بالقلم
تكون الشوكة وصلت للعظم
أنا مانخبي ما نكتم
الخارج من عمق دخالي
نكتبو بالقلم
ونقولو بلساني
وحر جرحي منو ما نسلم
منونقاسي منو نعاني
اللي ضربوا الضربة
هربوا علقوا فرو
والي سكت على لي ضرو
الشيطان غرو
هذاك شوف مع من تجروا
مع دوك لي حصلوا ما مرو
أو دوك الباقيين معانا يدورو
المحلوبة حليب والمعصورة دم
نزمم جرحي وعليه ما نندم
ما نبغي وسواس
والسكات على ضر الناس
والشهادة لله هي الأساس
أصحاب السيبة
باقيين يخربوا فالبيت
باقيين يخربوا فالزريبة
ينهبوا خيرات بلادنا الحبيبة
بالقنطار ونص لوقية
حركو فالراس سجية
ما يخلصو ضريبة
ما يخلصوا دعيرة
وخا تشوفوا بالتسبيح
تعرفوا خداع صحيح
البحيرة سايبة
والرباع مات
والخماس داه النعاس
اللي ماعندوا لا قلم ولا دواية
ما معول على قراية
وبلادنا حرام تبقى شفاية
هكذا القلم
هكذا الدواية
فهمني ولا نوض من حدايآ
