جانا كيف السلاطة
عدو الاطفال
عدو الكتاكيت
سارق الشكلاطة
تصورو معايا أنتما بزوج
الشكلاطة يسرقها الكروج
تدوب الشكلاطة
و ندوبو حتى حنا بزوج
يا أطفال يا كتاكيت
* * *
الكروج قاهر المسافات
هز علامنا ف شلا بلدان
شرفنا و شرف بلادنا بشلا ميداليات
كانت الفرحة ف حياتنا تقيل و تبات
مع الراضي و عويطه و نوال و الكروج
* * *
اليوم جانا كيف سلاطة
الكروج مول الكرفاطة
سارق الشكلاطة
على الشكلاطة الملاين تصرفو
و اللي خانك اليوم غدا تعرفو
كالوا الحكامة الجيدة غير فهامة
و ترجع على مولاها بالندامة
يا أصغر مسؤول يا مهاوش
ما لعبتي باللعاب
ما لعبتي بالقشاوش
* * *
يا كروج يا أصغر مسؤول
أقول و أنا قد القول
طاير منك لحيا و الحشمة
و مصندل قبل ما تكبر ليك اللحية
و خلطتي الجير بالملحة
بالرشوة دهنتي السير يسير
و شعلتي الزبيا بالكير
فعايلك كبار و خا انت صغير
نحن الأطفال
نحن الكتاكيت
نحبو الحلوة
نحبو الشكلاطة
لكل طفل
في كل بيت
* * *
اليوم جانا كيف السلاطة
الكروج مول لكرفاطة
سارق الشكلاطة
الشكلاطة بغيناها دابا
دابا ... دابا نيت
نحن الأطفال
نحن الكتاكيت
بشكلاطة نصبحوا أبطال
بشكلاطة نكتبوا اشعار
و نغنيو يا منبت الأحرار !؟
محمد ناجي