عبد العزيز سرحاني
عدد الرسائل : 64
Localisation : الخميسات
تاريخ التسجيل : 12/03/2014
 | | موضوع: الخِيبَالوريا الجمعة أغسطس 01, 2014 1:49 am | |
| الخِيبَالوريا ...الاجيال التي تصبوا إلى الأفضل عن طريق "النْقيلْ"... على من تْعَوَّلْ ؟ أنا كَنْسَوَّلْ... بْكِيتْ عليك ملي نفسك ف صورة الغِيرْ سدات لك العين وكَاتلك ...نْقَل...ونقلتي ودَقْتِي تفاحة الغش وتْبَنَّنْتي ونزلتي من الجنة لأرض المحنة و ولفتي على من تْعَوَّلْ ؟ أنا كَنْسَوَّلْ... بكيت عليك نهار "بَابَاكْ" عطاك الهاتف النقال وكالك عَيَّطْ لهُ ف كل دقيقة ما بغاك تكبر ما دار فيك ثقة كيْداري خوفهُ وقلْتْ فهامتهُ ب حبل كيربطك بِهْ وكيربط راسهُ معاك... ب يديه بغا الهاتف يكون غير هاتف ردتيه... أنت... نقال حيت ...أنت ...نقال الهاتف النقال ولىَّ محتال ولىَّ غدار ولىَّ شفار قطع مع الخير وتواصل مع العار وما تْهوَّلْ على من تْعَوَّلْ ؟ أنا كَنْسَوَّلْ... شْرِتي هاتف من الجوطية وبغيتي تجيب البكالوريا ونْسيتي كن كان الخوخ يداوي وكن ولات الخوخة زاوية نْسيتي كن كان النقيل طريق كن درتهُ صْديق وسلكتهُ على عيني وصبرت للضيق قبل انت ما تكون ولا تفيق تناسيتي شحال قدك من حَرْزْ شحال خصك تْفَرَّزْ ف جيوب عامرة خنز شحال قدك تَحْضِي ف اللي حاضيك وتْرَكَّزْ وقلبك ب الخوف تلف المشية وبدا يَتْشَلْ وخاطرك ب التلفة جلا الحْيا وبَدَّلْ الشوفة و ولىَّ حْوَلْ على من تْعَوَّلْ ؟ أنا كَنْسَوَّلْ... بغيتي تْبان ... حاجة وشان تبان تلميذ يا حسرة... تْبان انسان وبزاف عليك ماشي بزز ماشي ب اللي كان عمرك ما تكون ولا تكون ولا يكون ليك ولا يكون معاك ولا ف يديك ولا ف جيبك حيت انت نقال قرايتك اللارب تاريخك دايب ومستقبلك عايب واللي جا منك سَرُه يَصْبَحْ سايبْ خُدْ الديبلوم راه يواتيك كاين اللي خداه مشموم كاين اللي لبسُه تاج مرصع ب الورد معلوم وانت الحموم اللي ف يديك يشهد عليك والضحك اللي سابقك وتابعك يواسيك سْوَا كُنْتِ سْوَا غايب الحاصول ... أنت خايب وما بقا لي ما نطول على من تْعَوَّلْ ؟ أنا كَنْسَوَّلْ... يونيو2014 | |
|
ربيع عامر الغيواني
أديب مميز
عدد الرسائل : 1461
تاريخ التسجيل : 27/12/2007
| | موضوع: رد: الخِيبَالوريا الأحد أغسطس 03, 2014 3:47 pm | |
| ممتع كعادتك استاذنا الرائع دمت لنا ومنا | |
|
عبد العزيز سرحاني
عدد الرسائل : 64
Localisation : الخميسات
تاريخ التسجيل : 12/03/2014
| | موضوع: الخِيبَالوريا الإثنين أغسطس 04, 2014 1:13 am | |
| الاستاذ الفاضل السي ربيع عامر الغيواني
أدام الله وجودكم بالجامعة
وشرف كبير لي أن أكون مصدر متعتكم
شكرا على مروركم الجميل. | |
|
