قصيدة زجلية"خرجني من لحساب"
******
يالحاسب احسب وقاد لحساب
من زنقة لزنقة ومن باب لباب
عاودو القسمة في الثروة بين الحباب
خرجوا الدرويش من القصيدة بلاسراب
اعطيوه حقو في الما والتراب
وديرو ك الوزير ك الكراب
يا الحاسب احسب وقاد لحساب
ياك قالوا هادي قرون وحقاب
حساب الكاشوش ما يخرج حساب
مايفرق بين الذهب والتراب
وما يعزل الما من السراب
وما يسالي معاه لوم ولا عتاب
صوفوا ما يربط رجل لغراب
دراهموا ما يعمرو قراب
ما يشغل عاطل ما يفكو من لعذاب
يا الحاسب احسب وركز في لحساب
كون مرايا ماشي ماكياج كذاب
كشف لمخبي خرجومن الباب
لا تغلط ارقام لا تكثر تشطاب
انا مزاوك خرجني من لحساب
دير زايد ناقص وفكني من لعذاب
انامزاوك خرجني من لحساب
خرجني من لحساب
*******
ابزيري عبدالاله02/09/2014
