زماني ...

زماني ....

شكون يفكرني
نعطيه عقلي
نعطيه زماني
يشوفني منو
كيف كنت نعاني
كيف زمان
كان زماني
يرسمني لوحة
تشهد على الوقت
كيف قطعني
وبق منى شي قليل
حزتو ما كفاني
وبقيت نرقع كل يوم
ركنة بالمعاني
باش القصيدة تكبر
الحروف تعمَّر كياني
فيها نعيش الباقي من زماني
نمشي من حرف لحرف
من كلمة لكلمة
فوق السطر ديما تلقاني
نزين الخطوط
نرسم فوراق الوقت
امل
حكاية
ونقطعو كيف قطعني
هاد المرة نسبق
باغي ندير الشان لزماني
إلى ساعفاتني القصيدة
فيها نمرغ احضاني
ترفدني منِّي
نغرسو زمان جديد
فزماني
وتحضنِّي من تاني
داك الحضن بحر
تعلمني كيف نغوص
واخا لماج كبيرة
مزال نجبد العوم
معدن الصبر
شحال حفرت عليه
عاد لقاني
فجنب القصيدة واقف
وهي فاتحة الباب لزماني
دخلت طالب ضيف الله
محزم بحروف الولف
كانت من زمان الحق شاطناني
لقيت القصيدة
رحبة كبيرة بماليها
توسدت كلمة
كانت سابقاني
كالها
بل شوار لساني
ما قطعتو
لقيت ديك الكلمة
بين الكلام نافعاني
درت الحدود لجناني
وسقيتو من كل لون نقطة
تنبت الحروف ضاوية
بين احضاني
محبة
تسقي بذور الصحبة
القصيدة ما تنساني
نجددها
تجددني
نعطيها
تفهمني
ترجع الروح لكياني
نبنيو كل يوم ساحة جديدة
للحب
للعشق
وتكون البداية فاحضاني
القصيدة إلى بغاتني
نبنيلها فقلبي
وإلى بغيتها
تجيني كيف الحرف بغاني
نبنيو تاريخ فصدرها
تزوروكل لجيال
تتفكر الموروث ف المعاني
ف قلب القصيدة
لونو وجداني .
ما تموتش القصيدة
عايشة ديما
ف وراق الزمان
بين السطور صابغاها المعاني
القصيدة ما تخون
وثقتها
العاهد شاهد
كان حاضر
ملي خديتها ف احضاني
حَلْفَت ما تنساني
وكتبتها
باش نبقاو بجوج
شهود على بسمة
كانت بيني وبينها
بها شافت عيني الضو فزماني
القصيدة رحبة
فيها ندريو كاع الكلام
يبقى الصافي من الزريعة
والمخلط بالبهتان
تديه الريح من زماني
من زمان القصيدة
باش نعيش
فاحضانها هاني
القصيدة بغيت نشوف بها
كلشي
ننفذ منها ليَّ
ونخرجني حكاية
نكتبها على جناح ورقة
نطفي البياض من عيني
نكحلها بالحلو من جناني
وتشوفني واقف
على الصح بين قراني
القصيدة زماني
فيه كل يوم نلقاني

عبدالعالي الوالي

رائع أخي هذا الفضاء الشعري الذي 
تنسجه من بوح البلاغة أكثر من بلاغة
البوح والذي يجعل من القصيدة ذاكرة 
للاوعي في الكلمة من حيث هي كائن
مفهومي حسب دولوز
استمتعت أخي
شكرًا

هذا من ذوقك الرفيع السي مصطفى بلعوام سعدت بحضورك لك محبتي والود

ودمت بكل خير صديقي مصطفى رضوان لك أحترامي والود محباتْ

صديقي العزيز توفيق المبدع الجميل اشتقنا لك ولحضورك الرائع لك محبتي الصادقة

شكرا لك المبدعة الشاعرة والزجالة عائشة على القراءة الرائعة احترامي لك والود

اخى السلام عليك ورحمة الله ابداع جميل  من نوع النثير الزجلى المعاصر فعلا تفننت فى الكتابة المزيد من التالق