عمات ليك الدبّانـة
مع أولاد الفشوش
مع أولاد لكوش
الدبّانة حاصلة ف قاع الكاس
الدبّانة وفين تعطي الراس
العين شافت
والقلب ُوجع
واللي عرماتو الزبّالة
كدساتو لبركاصة
والمكروبات لبسناهم حلاسة
مع اصحاب الكراسا
مع اصحاب السياسة
صحة بنادم ديما ف خطر
طليا طليناها من الطاليات
هما يحسبوها بالحيطة والحظر
واحنا ديما نعيشوا ف الخطر
* * *
مع أولاد الفشوش
مع أولاد لكوش
الدبّانة حاصلة ف قاع الكاس
الدبّانة وفين تعطي الراس
كانت طبيعتنا زينة
كيف رباونا واليدينا
كانوا يصمطونا بالخروق
ويصبنوهم بصابون الحجرة
والفراكة درجة ... درجة
ولعصيّر بالراس الاول و الثاني
منين تغيب الشمس من مكانك و مكاني
ف الخريف أوف الليالي حياني
ينشفوهم فوق البرما
ينشفوهم فوق الݣدرة
ينشفوهم فوق الݣصبة
والمجمر زاهي بعدا
مرشوش بوراق فليو
مرشوش بوراق لخزامة
معطّر الغطاء والفراش
معطّر لعباين والكواش
معطّر الخاميّة و الوسادة
كانوا فحلات فوق العادة
بالدراع و الزين و الحداݣة
* * *
مع أولاد الفشوش
مع أولاد لكوش
الدبّانة حاصلة ف قاع الكاس
الدبّانة وفين تعطي الراس
وزيرو ميكا
ندوزوها بدكة
أو ندوزوها بتلصيقة ؟
مع اصحاب القلب
أو مع اصحاب الضيقة ؟
العين شافت
والقلب ُوجع
واللي عرماتو الزبّالة
كدساتو لبركاصة
والمكروبات لبسناهم حلاسة
مع اصحاب الكراسا
مع اصحاب السياسة
ياربي برّا والباس
الدبّانة تـــزنـــزن ...
ومـعاها طار النعاس
محمد نـــــاجـي
