القلب الصافي هواك
وبياض الورقة وتـاك
كنت غادي فواحدْ الطريقْ
وبانْ ليا عود رقيقْ
ويلا كنتي صاحبي
عتقني ف الضيقْ
العود الرقيقْ
نجارْتو ما تعميكْ
و تجارتو ما تغنيكْ
بعد ما كنتي غايبْ سنينْ و أعوامْ
و اليوم دعيتي بالقوّة بلا برهانْ
و اللي بداتو الحيةْ
كمّلوا الثعبان
و العداوة جابتْ الخسارةْ
و عمّ الطُوفانْ
وقلوب الرحمةْ
دخلاتها القسوةْ
و تعرات السترة
كيف القطرة كيف الجفافْ
مدى من ظلم
دارو القلمْ
وحتى واحد منا
منو ما سلمْ
لا إنسانْ
لا حيوانْ
ما يرضى بالحكرةْ
ما يرضى بالذلّ
ما رضينا بالاستعمارْ
و قاومنا المحتلّ
و اللي حقّ ناسو عليهْ
سنينْ و ينعسْ عليهْ
ما داري بالمضرورْ
و الغمّ اللي فيهْ
و نعاسُو راهو راكد فيهْ
منينْ يفيقْ يتباها بهْ
و لا أجر يثّبت ليه
يدير الخيرْ ف أهلو
و يمنّ عليه
و يجيب لبرّاني
يشهدْ ليهْ
فحال الليّ يقرا ياسينْ
على قلوب الكافرينْ
من كانْ راسْ
ورجعْ رجلينْ
و حنا كلنا عارفينْ
إذا حبك القمر بهلاله
أشْ عليكْ ف النجوم إذا مالو؟
محمد ناجي
