التسْلِيمْ
يَا الرَّامِي ضعْفِي بْحْجرْ لخْدِيعَة
حْطمتِي الضْـلوعْ
مَا نفذتِي للـــرُّوحْ
مَا بدّلتي لِي طبـِــــــــــــــــــيعَة
*****
مَا لقيتْ فْ سُوقْ لحْوَالْ شبيهْ
وَلا لقيتْ فْ دْلالة الطبَايعْ شَاري
صْحْت طالبْ التّسْلِيمْ
التّسْليـــــــــــــــــــــمْ
التّسْلِيمْ ليكْ يَا بيـــبَانْ رَايْبَة
صْدّات قفَــــــــــــــــــالهَا
لعْفُو مْنّك يَا بْلادْ سَـــــــايْبَة
رَامْيَة خارْج لسْوَارْ عْقالهَا
الشّكوَى لِيكْ يَاذِيكْ الغِيمَة
تطفِي نَارْهَا
العْمْدَة عْلِيكْ يَا ريحْ قدِيمَة
جَايَّة بْغبَارْهَا
*****
لعْفُو يَارَاسِي........التّسْلِيمْ
يَا صاحْبي فْ لمْرَايَة
يَا السَّايْحْ فْ رْبُوعْ التِّيهْ
يَا سَامْعْ لحْكـَـــــــــايَة
شانْك جَاكْ وْ ضْيّعتـِــيهْ
يَا شْريكِي فْ الغَـــايَة
الدّنْيَا لغزْ مَا فرّزْتـِــــيهْ
*****
التّسْليمْ يَا جْمْرَة فْ الصدْر وْقادَة
يَا طيفْ غْريبْ سَاكنْ لوْسـَــــادَة
يَا النَّاعْتْ فضْلِي بْ كْلامْ قبيحْ
حْصْدْتِي عْجَاجَة
حِيثْ زْرْعْتِي الرِّيـــــــــــــــــحْ.
