لميمة يا لميمة
يا ريحة التراب
الساكنة في عماق الآرض
يا مجمع لحباب
ضحكة بلا حد
تحمق لهبال
لميمة يا لميمة
مدرسة لعباد
ترباو فيها لجيال
يا زينة لبلاد
بلا بيك تخوى الخيمة
وترشى لحبال
آه يا لميمة
لفراق صعيب
إلا غبت معاك
الشمس تغيب
ويظلام علينا الحال
وإلا حضرت
لجبال تريب
ترجع سهول خضرة
أزهارها عينيك
أنهارها شقوق يديك
من النبع الصافي
تروي الورود
ما تخليها تدبال
آه يا لميمة
محلاها كليمة
خارجة من فمي
نغمة وترنيمة
معزوفة في دمي
موشومة في البال
لميمة يا لميمة
كلامك ما بحالو كلام
صوتك ينور الظلام
قنديل يسافر بالليل
يضوي كيف الهلال
آه يا لميمة
عمارة الدار
حلاوة السكار
طوبة طوبة
رحيق النوار
المنثور على كل دار
بالمحنة والطيبوبة
بالغنا والطبال
لميمة يا لميمة
يا السهرانة ديما
تخاف علي
إلا كان الوقت عطال
تراري بيا فوق الحمال
تكد في تعبي وشقايا
تهد في دمعي وبكايا
تخفف علي
إلا الحمل ثقال
لميمة يا لميمة
راه اليوم عيدك
فيه نفرحو بيك
نشعلو شموع
نمسحو دموع
بمنديل الفرحة
المكنونة بين الضلوع
تطيب الجرحة
ويكون الهنا لينا رجوع
وتتفاجى لهوال
اه يا لميمة
لو درت لي مايدار
لو قلت لي يتقال
ما نوفيك حقك
حقك فوق كل الحقوق
والجنة تحت قدامك
والخير يترجى أيامك
وعدو بآجاااااااااااااال
