َ
لميمة
مي يا مي لحبيبة مي يا مي
الغربة قاسية وصعيبة مي يا مي
شحال نذكرك فالغيبة مي يا مي
يام الجردة والقبيبة مي يا مي
.....
بغيت نقول لميمة كلام زوين
نبداه بسلام حنين
الله يسمح لينا منك ومن عرق الجبين..
من نهار عقلت ونتي واقفا
سهرانة الليل والفجر فايقا
المهم الحريرة والقهوة
والباقي كلشي ليه الدوا
راه ما نسيت شحال الشقا كان كتير
الصابون بالفراكا وما البير
شحال من طياب ولعجينة
وغسيل القمح وفرينا..
تنشريه فالنهار وتجمعيه فالليل
مرا الشمس سخونة، مرا السمرا كاينة
ولا تخليه راه الكمرا باينة......
إوا التنقية فيها عذاب
لي حضر حصل ولي سلت غاب
حنا نتسناو غير يتجمع فلخناشي
هذا قمح وهادي فرينة
باش لي عندها الزهر
هي تديه للمكينة
المهم ماشي الزنقة ولا الدوران
ولكن البسكليت مولات لفران
وحدة تبيدالي ووحدة شادة الخنشة فالتالي....
إوا ملي يطحن أراك للتغربيل
هدا بانيو هاذا طبك هذا طبسيل
من عند الفجر نسمعو
دبالج مي يصدعو
نعرفو اليوم كاينة النوبة
على الشغل بلا ما ندمعو
نفيقو لقاو مي يبانو فيها غير العينين
النواضر والحجبان والشفار مغطيين بالطحين
كانت تتغربل غير نهار الحد
تتكول ليوم لبنات كاعدين......
تكمل وتجمع اللواني
هدا طحين هادي سميدة هدي حمرة تاني
ومن لحداكة حوايجها من لفجر مجموعين
باش نمشيو للحمام كاملين
حمام الحارة ما فيه حزارة
لي مامشات ليوم........
ماكاين لا جمعة ولا تنين..
تغسل لينا هي والبنات لكبارات كانو هادكات....
وملي تجي للحالة تقاد
تكشيطة والنيف منكاد
غير الكحل وشويت لعكر وصويبينة
وها للا مينة شحال ولات زوينة...
هاد لمرا راها ما قاريا
ولكن فطينة ودكية
تعلمات من الراديو والناس
ومن الدنيا حتى هيا
قالو ياك غير أم لبنات
لكن حامدة وتقية
ما فضلت وحدة على وحدة
وما قالت فالناس خطية
.......
فالطريق تقول حافضة الكود
ما تنسى ما تفوتها إشارة
إلى تلفتي، التزم لحدود
وسولها تعطيك بشارة
راها كريمة وطيبة وسخية
لي عطاتك فرح بيه
ولي ما ديالك عينيها عليه حضية.....
عندها كلشي واضح وحتى خير ما تخبيه
غير قول بغيت.. تعطيك شوية
ولي كان غير على سبة
إلا بغا الخبز ينوض ليه.....
صواني أتاي والقهوة
والفاكية وحتى الحلوة
فكل عشية نتنشوى
هاديك هي دار لميمة
لي بعيد يبقى يتكوى...ولي قريب إجي ديما....
حبي ليك أمي كبير
ما يقدو كلام ولا قصايد
نعاودو ونضحكو شوية
ونبردو في الغربة لغدايد… …
