زگاوة الكتبة

من زگاوة* الكتبة
تخرج الحروف
وتسمع المعنى يزاوگ
حرف يتهجى
ومعنى يترجى
وكلمة ناوية
درجة ب درجة
تكون على القصيدة حجة
وتجري ف رضايا

من زگاوة الكتبة
تخرج الحروف
وتسمع المعنى يزاوگ
الله الله عليك
يا المولوع..
يا الملكوع..
يا الملسوع..
بسم القصيدة
الحروف ف ظلامنا شموع
والگلب بزز منه يطوع
وخة يكون حديدة

وأنا دوايا
لگيته ف هاذ الدواية
ولا گول:
أنا مداد
ف دواية
وقتهاش نولي
شي معنى
ولا شي حرف
ما يهم نكون ميم
وخة الاولين
سبقوها وارتاحو
وتكويت بيها أنايا
ما يهم نكون جيم
جمرة زاندة
ف معارك الضيم
والدخان طاير
يلالي ف سمايا
ما يهم نكون نون
صبر ناگة
صهد ديك الرفاگة
ها لامارتو
شاهدة ف المشطة مشاگة
حيت أنا اللي هبيل
ما درت لسويلفاتي عناية
ما يهم نكون همزة
طلعت عديمة الوفا
عطات الليف بالگفا
وخلاتو للحروف شفاية.

من زڭاوة الكتبة
تخرج الحروف
وتسمع المعنى يزاوگ:
ياك برد السروية
كون ما تهليلة الفجر
يبقى ديما
ف زرعي راگد
ياك غرام النية
كون ما جناوي الغدر
طعنات ف الظهر
يبقى ديما
ف هاذ الصدر خامد
وياك دم المعنى
كون ما بياض الورقة
يبقى ديما
علي شاهد

وأنا يكبر فِيّ الرجا
بزاف يكبر فِيَّ الرجا
ف دمعة
وخة عرجة
تخاوي الدموع
العاگرة ف العيون
وأنا يكبر في الرجا
بزاف يكبر في الرجا
ف مريرة
وخة عوجة
توصلني

لگاع الكون.