مليون شكارة في رمضان ( رحال اودغوغ )

مليون شكارة في رمضان


تبرعو علينا بي مليون شكارة
اوزادو في الدفاتر او لكتوب
خلاوّ في حياتنا المرارة
اليد قصيرة او الجيب متقوب
في المكتابة ماكين شطارة
غير خوي الى عندك شي جيوب
بالشكاير تبرعت لوزارة
اوزادت في الزيت او لحبوب
كل نهار تضربنا بغارة
اوزادت في سكر القالب و الطوب
زيادة الاسعار بلا امشارة
راه المسكين ضهرو معطوب
عيينا بالطلبة او لحزارة
راهم قتلونا بالوعد او لكدوب
كترو صحاب لقلوب المشرارة
او قلوب لمحبة عملو لها حجوب
راه رمضان عمّر الحارة
او صيرو ما كان محسوب
زمان اليوم ماعندنا عليه خيارة
القلب مريض او لفم مضروب
حتى بين حبابنا نقصت الزيارة
كلاّ شاد روكنو او مكروب
فين مشات ايام العز او لقصارة
ايام ما فيها كره ما فيها حروب
رد بالك يا بنادم راه الدنيا غدّارة
اليوم راك في العز او غدا الزمان عليك مقلوب
راه الدوايرْ دوّارة
و العز من عند الله موهوب
راه كلشي في كتاب عندو راه مكتوب


رحال اودغوغ