المواطنة
يا البارك ورا السور
يتفرج ف الظل ع لي جاري
حل فمك
خرج لسانك
دير له جبيرة
لخبار كيف البارح كتدور
فمك مخيط ب ليباري
نسل الخيط
ريب الحيط
و لوح حروفك ع الحصيرة
لا تكون نعجة و لا ثور
دري حروفك بالمداري
خرج الراكد
كون واكد
عزاب و الحياة قصيرة
السياسة
يا الداخل سوق الجهالة
صوط على فهامتك تطيب
حل عين
و شوف آش كاين
و سايس مع الساسة
الكلام معجون بالعمالة
حروفه حدجة و تبان زبيب
بانت اللعبة
كلها كدبة
مزوقة من برا و محلاسة
الحرية
يا ذاك الطير الحر ف العلالي
لا دير عش ف ذيك الكدية
عشك يكون ف السما
الجوع يخليك تعمى
تنزل مسرح جناحك منتوف
زمان لمان لي كان يشالي
طار مع العسة و الحضية
مضي الضفار
ف زمان غدار
يبيعوك لعجل و انت تشوف
المخزن
السمية وشمة ف الكناش
مقدم الدرب و الشيخ حاضي
يكتب و زمم
هذا مسيوك هذا يخمم
و التراب تحت الرجل براح
سرط هذي و لاتقول علاش
الزمان يحنت ماضي
الفم كمامة
و الراس نعامة
و كثير الفهامة يولي شطاح
التعليم
الليف دخل سوق جواه
ما بقى يجمع وقفة
محكور وسط خوته
كيتسناوا ف موته
Livreو التيلاوة صداوا
المداد عايم ف واد هواه
هرس الدواية و بدل الحرفة
الشكارة مع الموضة
و القيسم فوضة
و ناسMr segain تقاداوا
