ذاك الباكي ب الدمعة
لا تسوله: مالك ؟
الا بغيتي تحس ب الوجعة
عطيه القلب ذيالك
الدنيا حال و حوال
مرة باكي مرة ضاحك
الحمل ف القلب الا ثقال
تغيب الشمس ف صباحك
قلت نقطع البحر
و نتصالح مع راسي
لقيته ب مواجه قبر
و محفور ب ايَّاسي
يا لهبيلة يا عيني علاش الدموع؟
مازال تبكي و تشوفي
الطريق طويلة تنواحها مسموع
تكايسي علي و روفي
شفت الدري يحبو صغير
قت له ف خاطري:آش يتسناك؟
ملي يكبر جناحك و تطير
الزمان ينتف الريش لي علاك
القبر لي حفروا لي اليوم
غدا بالفاس يتحفر لهم
الدنيا مهما طالت ما تدوم
لكفن لي غطاني يغطيهم
يا لمغطي ب الريش
دروك الريح تجي و تعريك
ما تدي غير توب بيض و هشيش
و تراب لقبر يدريك
الحيط الراشي ما تسند عليه
و الكلام ف رحبة لعسل لا تذوقه
الوجه لمفرنس غير سير و خليه
و اللغا بين النسا لا تدخل سوقه
خلي لكلام بينا سبولة
نادر ما تدريه غير الخاوة
الدنيا مهما طالت مهبولة
نقسموا اللقمة و نذوقوها بحلاوة
مشموم النوار يا الشانت بزينه
غدا و لا بعده راك تنشف
يشريك كل من بغى يكمل دينه
يطير الزين ولي مشى ما يخلف
يا الداخل سوق الهم
لي فيك قالوا : يكفيك
الا شريتي راك تندم
و الا بعتي الشاري ما يوفيك
الدنيا كتاب باهتة حروفه
ما تقراه عين الجلالة
القلب لهبيل ما يشوفه
و العقل يتخيله جهالة
قالوا حق الجار ع الجار
و لي شراك بوس قدامه
و لي فمه مشرع هضار
بيعه و تخطى سلامه
شوفة العين مرايا
و الضحكة الزينة ف الوجه عربون
فيها عَزِّي و جلايا
الضحكة الصفرة رماد ف كانون
كثرة لفهامة تعلم السهير
و القلب لي يدور كيف الرحى هشاش
مقدر و مكتاب آش يدير ؟
لا تسوله علاش؟ و كيفاش؟
الظهر لمقوس بالخوف
خاف منه و لا تسند عليه
النفس باردة و القلب مرخوف
يعطيك بالظهر، غير سير خليه
الصندوق مفصل ف رحبة السَّاسَة
ضامة بَنْفُخْ و سير تْضِّيمْ
الضحكة بلونها ملحاسة
خلي الصوت ف حلقك يا الفهيم
حل عينيك و طول لسانك
و لا تخليهم يشوفوا لك
ما تكفن كلمة ورا سنانك
سمع لقلبك و خليه يسمع لك
الزمان كبة من الصوف
مخبلة فين قرشالها؟
الحكرة و قلة الجهد و الخوف
مخلط فيها لحرام بحلالها
