و راني غير داوي

زائر

علي مفتاح

اِلا عْليكْ دارْ الزمانْ دَوَرْتُه
شَدّ راسَكْ وُ سايَسْ
وَ اِلا فْ ڨلبَكْ شَعَّلْ جْمَرْتُه
دَلِّي رَاسَكْ وُ ڨولْ لِهْ: تْكَايَسْ

وَ الدَّنْيا هذه ضَرْگة كُلْهَا شوكْ
الڨلبْ مَجْرابْ وَ اللسَانْ مَحْسوكْ
اِلا نْطَقْ بْ الْحَقْ يَتْقَطَّع
وِ اِلا شْكا، شْكاهْ ما يَتَّسْمَعْ .

الدنيا مْعاكْ لابْسَة تُوبْ كْحَلْ
وُ رَجْلَكْ غارْقَة فْ غَيَسْهَا
تْهَزّ رْجَلْ وَ الاُخْرَى تَوْحَلْ
عَدِّي يا وَدِّي وُ زِيدْ سَايَسْهَا

هِيَ دنيا وَ مَهْبُولَة
بنادَمْ فيها مَسْلوبْ

نْفُوسْهُمْ بارْدَة مَقْتُولَة
الجُّوعْ الذَّلْ وَ الَكْرُوبْ

نَاسْهُمْ بَ الخُوفْ مَذْلولَة
العَدْلْ وَسْطُهُمْ مَنْكُوبْ

هِيَ غابَة وَ مَجْهُولَة
الضّعيفْ مْعَلَّقْ مَصْلُوبْ

الحَقْ كَلْمَة مَقْتُولَة
وَ العَدْلْ بِينْهُمْ مَعْطُوبْ

فَكَّرْ فْ َشَّلة طُرْقَانْ
وَ حَتَّى طريقْ ما خَرْجَاتُه
طريقْ الهَمْ وَ الَمْحَانْ
وَ النَّفْسْ اللاَّيْمَة مَا هَنَّاتُه

الجْبَالْ تَبْكِي مَنْ بْكانَا
وَ الهَمْ فْ ڨلُوبْنَا عْجَاجْ
يا حَسْرَة الفَرْحْ بَعَّدْ وَ نْسَانَا
وَ الزّْهَرْ فْ طْرِيقْنَا عْوَاجْ

الغُْمَّة راكَْبَة الرَّاسْ
مَنْ الشْعَرْ حَتّى لْ السَّاسْ
وَ الڨلبْ شْوَارِي مَنْ الاَحْزَانْ
مْسَرَّجْ عْلى عَوْدْ حَرَّانْ

دْهَنْ وُ زِيدْ دْهَنْ
وُ عَمَّرْ كَرْشَكْ بَ وْسَخْهَا
نْسِيتِي المُوتْ وَ الَكْفَنْ
الدنيا زايْلَة لازَمْ تَعْرَفْها

و الدنيا هَذِه لوحْ
الَعْقَلْ فيهَا يَتْعَلَّمْ
كُلْ دَرْسْ بَ جْرُوحْ
كُلْ جُرْحْ فيكْ يَهَدَّمْ

الدنيا حَمْقَا مَهْبُولَة
شَفْتيهَا بْ الَعْقَل تَحْمَاقْ
تْعَنْقَكْ بْ يَدِّينْ مَحْلُولَة
وَ ْف خاطَرْهَا تَطْلَبْ الَفْرَاقْ

الدنيا بَابْ وُ بَابْ
وَ ُكلْ بابْ بْ عَتْبَة
كُلْ خَطْوَة بَ حْسَابْ
الدنيا فَخّ وُ نَشْبَة

الدنيا ضَافْرَة شْعَرْهَا
وَ مْكَحْلَة الْعَيْنِينْ
تَتْسَيَّفْ وَ يْبَانْ غْدَرْهَا
وَ ْف اَلغْدَرْ يَطِيرْ الزِّينْ

دنيا هذه تَلْعَبْ بِكْ
ما تَلْعَبْ بِها
قادْرَة تْوَرِّيِنِي وَ تْوَرِّيكْ
لا ثِقْ فيهَا

و الدنيا هذه مَحْكُومَة بَ المالْ
نارْها شاعْلَة
فْتِيلة ضاوْيَة مَنْ الَحْلالْ
وَ بْ الَحْرَامْ ذابْلَة .

ڨلتْ غَدَّا يَتْبَدَّلْ الحَالْ
وَ الَمْهَرَّسْ فينا نْجَبْرُوهْ
يا حَسْرَة الهَمْ فينا طالْ
وَ الفَرْحْ فْ ايَّامْنَا نْوَدْعُوهْ

ڨلتْ السْبُولَة المَسْقِيَّة بَ الَعْرُوقْ
غَلَّتْهَا تْبَانْ عْلينَا
الخُبْزْ ما يَبْقَى حَلْمْ مَسْرُوقْ
وَ الْعَدْل يَحْكُمْ فِينَا

ڨلتْ الْمَعْرُوضَة مَنْ الخِيرْ
اِلا شَاعَتْ الَمْحَبَّة بِينْ النَّاسْ
الفَرْقْ بِينْ الَعْبَادْ يَطِيرْ
كلمَة حْلُوَّة دْوَا لِلاحْسَاسْ

ڨلتْ نَزَرْعُوهَا كَلْمَة
تَنْبَتْ وَ تَعْطِي الَحْرُوفْ
ڨلتْ نَحَرْثُوهَا نَغْمَة
نَسَمْعُوها بَ النَّايْ وَ الدْفُوفْ

ياكْ الزْرَعْ الَمْوَرَّڨ بَ سْبُولَة
فْ سَعَدْ المَنْجَلْ
القامَة بَ دْرَاعَاتْ مَفْتُولَة
فْ يُومْ تَذُّوبْ وَ تَذْبَلْ

ياك دْوامْ الحَالْ مَنْ المُحَالْ
وَ الطَّامَعْ فْ الجْبَلْ يَبَاتْ فْ الَوْطَى
يَطْلَعْ بَ النْهَارْ وُ مَا طالْ
يَوْصَلْ للَرَّاسْ وَ تَكَرْكَبُه الهَبْطَة

ياكْ الشَّمْسْ العَالْيَة فْ ذيكْ السْمَا
دْفَا وَ نُورْ للَعْبَادْ
تَطِيحْ فْ الَبْحَرْ وَ تْبَاتْ فْ المَا
دَرْس لْكُلْ مَنْ هُوَ جَلاَّدْ

ياكْ الطْمَعْ طاعُونْ يَا انْسَانْ
سَرُّه فَ حْكَايَة زُوجْ خُوتْ
خْذا مَنُّه الارْضْ وَ الفَدَّانْ
ما صْبَحْ صْبَاحُه حْتى دَّاهْ المُوتْ

دَوَّرْهَا فْ رَاسَكْ دَوْرَة
وَ حْسَبْهَا حَسْبَة الَعْقَلْ
الَكْبِيرْ ف ْالَفْهَامَة بِينْ النْسُورَة
يَسَوْكُوا لِهْ الَفْلالَسْ اِلا حْصَلْ

الَوْجَهْ العَرْيَانْ فْ سَعْدَ الجْرِيحَة
يَمْشِي مَنُّه حْرُوفْ الزِّينْ
لِّي تَعَفَّرْ عَ الْكَرْمُوسْ يَاكْلُه شْرِيحَة
وَ دًودْهَا سَارَحْ بِينْ اليَدِّينْ

يَدْ الطْمَعْ تَشَدّ وَ تَخْزَنْ فْ الشْكَارَة
اِلا سَوَّلْتِها تْڨولْ لِكْ : زِيدْنِي
تَعْطِي بَ اليمِينْ وُ اليسَرْ وَ تَڨولْ:آرَا
الڨَرْشْ الَمْصَدِّي رَاهْ يَفِيدْنِي

الرَّمَلْ الطَّاَمْع فْ المَاء
ديما لَكْحَانْ
كيفْ ذاكْ المَْشَوَّڨْ فْ النَّعْمَة
بايَتْ جِيعَانْ

و الدنيا راها للَزْوَالَة
يا العاشَقْ فْ الڨَرْشْ تَمَعَّنْ
فَكَّرْ وَ بَدَّلْ هذه الحَالَة
قْبَلْ ما يَوَصْلَكْ تُوبْ الَكْفَنْ

ما كايَنْ غِيرْ رَبِّي وَ المُوتْ
قْبَرْ وَ دْفَنْ
الدنيا اِلا طالَتْ راها تَفُوتْ
تَرَابْ وَ كفَنْ

الغُرْبَالْ المَثْقُوبْ....
ما يَغَرْبَلْ نُخَالَة
كيفْ الَمْغَطِّي بَ الذّنُوبْ
يَمُوتْ بَ جْهَالَة

حُطْ حْيَاتَكْ فْ الميزانْ
وَ عْبَرْ الخِيرْ فيها مَنْ الشَرّ
السَّوْطَ المَفْتُولْ وَ النِّيبَانْ
كلامْ مَحْفُورْ كُلُّه غْدَرْ

الحِيلَة فْ راسَكْ نابْتَة
شَجْرَة بَ جْذُورْ
الَفَّامْ بَ الخُوفْ سَاكْتَة
بنادم بَ الجُّوعْ مَضْرُورْ
[right][/right]

زجل بنكهة مجدوبية غيوانية مرة أحرى تحية لقلمك المميز

شكرا لهذا المجهود الذي بدلته لتنتج هذا الجمال
قصيدة معبرة

راك غير داوي اوديك فيه دوايا

ممتع كما عهدتك

زائر

أسماء محمد كتب:: زجل بنكهة مجدوبية غيوانية مرة أحرى تحية لقلمك المميز

شكرا على المرور الذي اسعدني
احترامي و تقديري

زائر

حميد يوسفي كتب:: شكرا لهذا المجهود الذي بدلته لتنتج هذا الجمال
قصيدة معبرة

و شكرا لمرورك بين حريفاتي
احترامي و تقديري

زائر

ربيع عامر الغيواني كتب:: راك غير داوي اوديك فيه دوايا

ممتع كما عهدتك

الاخ المبدع ربيع
اشكرك ايها الاخ على المرور
تقبل احترامي و تقديري

» وراني غير داوي
» و راني غير بوهالي