حلاقم الوقت....

موضوع: حلاقم الوقت.... السبت ديسمبر 05, 2009 1:14 pm

حْلاقَمْ الْوَقْتْ

خَشِّيتْ صْبَاحِي
وگَمَّطْتْ لِيلِي
رَارِيتْ بِيهُمْ
فْكُونَةْ گَاشُوشِي
وعْلَى خُبِّيرَةْ سْكَاتِي
رَگْدُو رَگْدَة

سَاوِيتْ صْبَاعِي
ومَا تْسَاوَاوْ
كِيفْ دْبَالَجْ لِيَّامْ
كِيفْ سْوَايْعْ مْحَقَّة
ومُورِي شَادَّاهْ الرَّعْدَة

سَخَّنْتْ مْسَنْ
يْطَنْطَنْ
نْكَمَّدْ بِيهْ حْلاقَمْ الْوَقْتْ
ولْسَانْ يْوَلْوَلْ
مِيزَانُو بْلا عَدَّة

فَيَّقْتْ الْمَكْتُوبْ
يْسَتَّفْ قَرْمُودْ سْوَايْعْ
الْبَارَحْ وغَدَّا

الْحَالْ تَمْتَمْ
فْگَاعْ السَّلامْ
فْطْرِيقْ حَرْشَة
مَا تْشُوفْهَا سْحَابَة

ومَا يْعَلِّي عْلِيهَا طَيْرْ
ومَا يْزَنْزَنْ عْلِيهَا نْحَلْ الشَّهْدَة

صَوْتْ يْفَرْفَرْ
عْلَى غْصُنْ مْشَاوَرْ احْمَاقُو
فْرْبِيعْ تَالَفْ عْلَى رْبِيعُو
فْزْنيْگَة مَا تَنْبَتْ فِيهَا وَرْدَة

تْكَرْكَبْ الشُّوقْ
عْلَى شُوقْ اشْوَاقِي
وشُوقْ ادْخَالِي
يَغْمَزْ اشْوَاقْ الْغُدَّة

طَاحْ الشّْفُرْ
عْلَى خَدِّي
وجْرَحْ گَدْمِي
وبْكَى لَفْرَاقْ
عْلَى فْرَاقْ شْفَارِي
فْوَقْتْ الشَدَّة

وطَاحْ الصّْبَرْ لَمْعَلَّگْ
ونبْحُو عْلِيهْ كْلابْ الْوَقْتْ
مَا عَضُّوهْ
مَا جْرَاوْ عْلِيهْ
هَزُّوهْ
هَزَّةْ الْمَدْرَة لْغْبَارْهَا

تْلَفْ التَّالْفْ
فْزْمَانْ التَّلْفَة
واللِّي مَا يَتْلَفْ
مَا نْحْسْبُو تَالَفْ فْهْوَاهَا

قْرَيْتْ الْكَفّْ
فْسْلامْ لَكْفُوفْ
حَنْحَنْ الجُّوفْ
فْظْلامْ الْكَفّْ الْمَكْفُوفْ
فْضَرْبَةْ الْغَفْلَة اللِّي مَا نْوَاهَا

جْدَمْ الْبَارَكْ
عْلَى عَتْبَة مَشْدَاگَة
والْبَرْكَة قْرَاتْ حْرُوفْهَا

ونْسَاتْ التَّا مَرْبُوطَة
فْعَتْبَةْ شْقَاهَا.

الصديق محمد مومر

أقتبس لك هذا المقطع الذي يترجم الصورة الواضحة في كياني
شكرا لك

سَاوِيتْ صْبَاعِي
ومَا تْسَاوَاوْ
كِيفْ دْبَالَجْ لِيَّامْ
كِيفْ سْوَايْعْ مْحَقَّة
ومُورِي شَادَّاهْ الرَّعْدَة

تشكيل جميل لمعاني عميقة يمتزج فيها الذاتي بالموضوعي عبر حرف دارجي أصيل ...
تحيتي أخي السي محمد مومر لحرفك النابض دوما بحال لحال...
إحترامي وتقديري

موضوع: رد الأحد ديسمبر 06, 2009 2:03 pm

الأخ المبدع محمد مومر

أشكرك جزيل الشكر على السيولة الفنية لقلمك زجلا
ممتعا بصوره الجميلة وما تحمله من معاني لها رغبة
معانقة المتلقي وحمله على استيعاب خبايا مضمون النص
مزيد من الكتابة والابداع
مودتــــــــــــــي

العزيز سي محمد مومر

نص زجلي متميز، غني بمعانيه المتعددة ومشوق يشد المتلقي إلى أخر حرف
شكرا لك .. مودتي وتقديري

» الفن .. وصحاب الوقت
» مرقص الوقت
» لعنة الوقت
» حرفي...ونياب الوقت