راني ساهر هاد الليله...نخمم ونقاد لـحروف
مال هاد لحياةْ لويلـه ...عايشين لحكّْرَ ولخوف
واحـد دّاهـا بـلحيلـه ... لاخـر قاعـد ويشـوف
هالّي تايقها وهبيلـه ... هالّي بالصّوف كي لخروف
ولّـي معـاه قـلــيلـه ... ولّي من ريشو منتوف
يّام لحـكّْْْره طويلـه ... متوْصفـهاش حـروف
وانا ساهر هاد الليله...وراني بسهيري معروف
......................
الفن هو إلى الصراحه...حيت بلمعقول يتقال
ماشي النفس مرتاحه ...ولكـتابه بمشـحال
كاينين لي مشـحاحه ...وعايشـينها بهبـال
كاينـين لي بحبـاحه...ولي ماسوّْل ما سال
حاسبها سوق فلاحـه...راه يسـاوم بلمـال
يسحابلو الفن دلاّحـه...حاضي الميزان يتقال
.....................................
شحال من هدرَه خسرات...بانْيِينها على الخاوي
خير من شـي السكـات ... هو دوى ويداوي
قالو لّي فات مات ... ولّي جاي فمطاوي
هالّي بايت فشتات ... هالّي عايش بتناوي
هالّي دافعها لغوات ... وهو من داخل خاوي
شي عايش بلفتات ... شي مكّْهوم بلمشاوي
شي بلجوع مات ... شي بالسمن ولملاوي
.......................
شفتْ لمدون مقامر ... والزهر هو لّي يختار
أنا عشت عمري مغامر ... ومازل ملقيتش الدار
شي بالشوى ولمجامر ... وحنا كي لقط ولفار
شي فبيروه شاخر ... وشي طالي لغبار
وشي بتخمامو عامر ... وشي قصّار فلبار
شي من اللوْل خاسر ... صابر كاتم لضرار
راني بهمّي عامر ... وردّيتْ همي فدفتار
................
صحاب الوقت قهرونَا ... كّْاع لي داروه مزيان !؟
فيهوم غير لقمّونه ... ولخاوي إبان إبان
لفلوس فلفوق مسكونه ... الحاله ديمَه مزيان
هوم جيابهوم سخونه ... وحنا لكتير عريان
الشابع فينا بزيتونه ... ولّ شبعانين حزان
لهموم بينا مقرونه ... ولفرحْ يمشي زربان
هدرنا وما سمعونَا ... سكتنا نغزّو لسنان
بغيناها زعمَ موزونه ...ياك عدنا ميزان
وْ إلى غابه علمونه ... ولحال يبان يبان...
...............
ومني قريـتُ عليـها...قالت لي : شنو زعمه؟
أنـا نعـبّـر ليـها ...وهي ما فهمات كلمَه
كلّْْها وكيف يدّيـهـا ...كلها آش عنـدو تمَّ
كاين لي بالدين يبغينا ...وكاين لي ماعندها حشمَه
كلها واش لقى فيهـا ...وكاين لي هـازّو المَا
لمرى إلى حنّيتي عليها ...كاين لي تشبعها دغمَه
وكاين لي رخفتي ليها ...الدّير الكيف والشـمَّه
إلى بغاك ربي ليهـا ...شي مرَه فالدار نعـمَه
ولي الشر باين فيهـا ...وشي مره فالدار نقمَه
وكاين لي سـوّلتيهـا...لجواب منـها نغـمَه
وكاين لي فرحان تجيها..وترد ليك الدار غـمّه
.................
بالـفن بغـيت نبـدَى ...وشوف كـيف ولاّتْ
الفن يا صاحبي وجده...كلها ليه آش عطـات
كاين لي كلامو رعدَه ... لي فالهـمْ يـبـاتْ
وكاين لي يفكر معدَه ...والفرق فـاش بقـات
خاسك تـحس بعـد...وخلّيها وكيف بغـات
خـلّي القلـب يبـدَ...خلّي الهدره بسـكات
كاين لي كلامو زبدَه ...ولي سكاتـو بميـات
كاين لي حاسبها زردَه...وكل كرش آش كلات
وكاين لي شايفها وردَة...وراضي بلّي ليه عطات
