وقت الحزة....

وَقْتْ الْحَزَّة

الْمَا عَطْشَانْ
فْزْمَانْ اللَّكْحَة
لَبْحَرْ مَالَحْ
الْوَادْ وَاكَحْ
والشَّمْسْ تَضْحَكْ
عَلْ الْيَابَسْ اللِّي رْشَا

ضْلُوعْ الرِّيحْ
مَشْگَتْ
بْلَحْفَا
مَا كْسَاهَا ظَلْ
ولا طَلْ

ولا نْدَى ضَايْعْ
ومَا رَشْهَا رَشَّة
الْبَيْضَة بَاعَتْ مَحْهَا
للْجّْبِِيرَة
تْجَبَّرْ شْقُوفْهَا
مَنْ هُرْسَةْ الدّْوَامْ
مَنْ عُشّْ غْرِيبْ
مَا خَشّْهَا خَشَّة

الدَّمْعَة الْحُرَّة
مَا فَاجَاتْ اهْوَالْ مَضْيُومَة
عَامَتْ فْدْمُوعْ زَفْرَة
مَا تَعْرَفْ لَگْلُوبْ الْمَهْمُومَة
وحَيْكْ لِيَّامْ
شَدّْ عْبَارُو
عْلَى ذَاتْ هَازَاهَا الرَّعْشَة
حْزَامْ مْشَرْوَطْ
تَحْزِيمْتُو
طْرَشْهَا ضِيمْ مَضْيُومْ
جْنَابْ الْحَيْطْ الْمَرْدُومْ
تْرَابو تْوَحَّشْ مْوَالِيهْ
تْوَحَّشْ النّْوَالَة
وخْيَالْ الجْدُودْ سَتْرَة
فْمَنْزَهْ ولا عُشَّة

رْكَاكَبْ الْخَيْلْ صَدَّاتْ
فْسْرُوجْ مَنْسِيَّة
عْيَاتْ بْرْكُوبْ لَفْضُولْ
بْرْزُزْ مْلْويَّة بْلَغْدَرْ
ومْحَارَكْ غَضْبَانَة
وعَلافَّة مَثْقُوبَة
شْعِيرْهَا صَوَّفْ فْلْخَنْشَة

هَرْبَتْ الْكَلْمَة الْمُوزُونَة
عْلَى گَدِّيدْ لَكْلامْ
مَخْزُونَة
شَمَّتْ رِيحتُو
فْبْطَايْنْ مَنْتُوفَة
مَنْشُورَة
عْلَى سُورْ بَكْرِي
تْعَرَّاتْ احْجَارو
وقْوَافِي لْيُومْ بْالْكُمْشَة

لَبْرَا عَنّْگَتْ الْمَخْيَطْ
وبْكَاتْ مْعَاهْ
شْكَاتْ عْلِيهْ
بْغُرْبَة لَخْيُوطْ
بْالْوَانْ مَفْطُومَة
تْوَحْشَتْ صْبَاعْ الْحَادْگَة
الْحَنَّة بَلْدِيَة
فْزْلافَة
عْرِيسْهَا طَالَبْ
عْلَى شَمْعَةْ التَّخْرِيجَة
تْعَشَّى

الدّْرَاعْ الْمَصْقُولْ بْزِينُو
بَاعْ شْمَارُو
فْوَقْتْ الْحَزَّة
ولَعْگَزْ رْمَاهْ عْلَى كْتَافُو
يتْبَاهَى بِيهْ
فْرَحْبَةْ الْمْعَاگِيزْ
عْلَى خْيَالُو يَتْمَشَّى.

الاخ المحترم والعزيز احميدة بلبالي

تحية تقدير ومحبة

جد سعيد بتوقيعك البهي على هده القصيدة...
واتمنى ان نلتقي للتعرف عليك عن قرب...
مودتي

الاخ العزيز حميد بركي

لك مني كل التقدير والاحترام
شكرا جريلا علي كلماتك الرقيقة والمعبرة
تحياتي الصادقة
مودتي