من زمان
صار لي نفتش
على قلب حنين
إمحني الأمان
إمحني الحنان
...
سندباد بحار
سافرت و جلت
ف كل مكان
قطعت بحور
تسلقت جبال
قطعت صحاري
قطعت قفار
مسرج لخيول..خيال
كل حبة رمل
عرفاتني
عاشق ولهان
...
نبحث على شقيق القمر
فوق الأرض الواسعة
قْدَامي دماها السؤال
حتى طنيت ف البال
عمري ما نلقاه
الراية اليضة رفعت
ف الأخير ستسلمت
تركت أمرو للقدر
...
هكذا مرت سنين
و ف يوم:
وانا مشغول
قُدامي وقف
قمر جميل
من السما نزل
بدر تام
كامل مكمول
سبحان الله
من زين بهاه
القلب اللي كان
وحيد حزين
الفرحة عرفات طريقها ليه
خفقان شديد عتراه
إرتعاش لدين
عرق الجبين
فيه بقيت
نحقق الشوف
بهرني الزين
شحال محلاه
حلم هذا..؟ولا وقيع؟
...
نفسي
ما صدقاتش
شعرت كأني فوق
غمام السحاب طاير
مجاور النجمات
لحظة من عمر الزمان لطويل
الحلم فيها تحقق
الفؤاد بنبض الحب الصادق
صار خافق
الإرتباك علي ظاهر
من الدهشة فقت
و قلت لو:
أش حب الخاطر؟
أمر نعمل
كل طلب ليك
أنا اللبيه
شبيك
لبيك
غير علي شير
طير..
أنا صرت ف قفص غرامك
أسير..
مريش الريش
ما نقد نطير
...
تبسم عجبو لكلام
وطلب مني بصوت حنين
الناولو ورقة و قلم
عليها كتب:
رقم هاتف محمول
وغادر
بعدما علي وكد
نهاتفو عند مغيب
شمس الأصيل
...
مرات سوايع الصباح
كأنها سنوات
لعشية وصلات
مكان معزول بعيد
على كل ضجيج
على كل صداع
المكالمة ختارت
نجري معاه
حبيت الناخذ راحتي ف لحديث
الرقم المعلوم ركبت
رن الرنين مرتين
الصوت الجذاب جاوب
وقال:
...
آلو..شكون؟
رديت بعد السلام
فلانة هذي؟
نعام.
فلان أنا.
الصوت حسيت
تغير
همس صار
نطق و قال:
ليك تنعتذر
ما عرفتك من لوول
مع العلم مكالمتك
بلهفة و شوق
تنتساين.
جاوبتو بقول:
ما كاين باس
صوتي ذابا عليه تتعوود
وذابا إلا جا على خاطرك
فهميني آش كان قصدك
من رقمك تعطيني؟
وتزيدي خلفة
بلا ما لي توضحي
أمرك!
...
ضحكات و قالت:
مالك زربان؟
كيف حالك بعدا؟
سمع لكلام كثير
ف تليفون ما ينفع
إلا كان ممكن
أنا طالبة منك
تعطيني من وقتك
شي ساعة زمان
نتلقى فيها معاك غذا
مع الربعة
أنا محتاجةنتكلم معاك
على شلى حاجات ليك
بغيت نعبر
على طلبها وافقت
عطيتها موعيد
عند الربعة تغذا بالتحديد
ليها ودعت
الخط بيني و بينها تقطع
...
ليلتها
سهرت الليل
نفكر منين نتلقاها
ليها حتى أنايا آش نقول؟
اللسان كيف نفك
منو العقدة؟
خايف إصبني
تلعثوم القول
خايف قدام
لوح عشقها
نصير ثلميذ خجول
ما نعرف نقرا
حروف هوايا ليها
سبات طعم النوم
ضيفها قدامي مرسوم
إطاردني فين ما ندور
عند لفجر
غفيت شوية
مشات بي عينيا
نشوف فيها
زارتني ف منام
نحلم بها
خبر و سلام
...
راكبة عاود دهم
لجامو ذهب
سرجو مطرز
حرير خضر
ناقشة حنة
لابسة أحلى حلة
وسط ساحة واسعة
صارت واقفة
مرشوشة ما زهر معطرة
خدم و حشم موراها
حاملة مجامر فضة
تفوح منها
عطور و بخور
عين الله حطياها
وانا أمير ف قصر
من الشرفة نظل
ليا إزفوها
قلت:
بشارة خير هذي
لما من منامي فقت
...
لملقايا بها ستعدت
لبست أحلى
ما عندي من ثوب
عل لمراية طليت
ذاتي عطرت
فرحان طفل صغير
رقصت..
غنيت..
سهم لغرام
أول مرة القلب إصيب
من الدار خرجت
ميساج قصير
ليها رسلت
نخبرها فيه
راه وقت الميعاد وصل
عليا ردات كاتبة:
هاني جاية ف الطريق
لمكان اللقاء
بجوج دقايق
قبل منها وصلت
مرات علي كأنها دهر
...
شقيقة القمر
ها هي وصلات
للعين بانت
تمشي مشيت لحمام
ف رياض عاطر
واثق الخطوات
لابسة لباس جديد
لوجه مدور
بالنور منور
لعيون كوحل
نور القنديل
الفم عنقود لعنب
مكياج خفيف
متحجب بزيف
فستان طويل
زادها وقار جميل
على محياها
بسمة صغيرة
رسمات
مدات إديها ليا ب التحية
وسلمات
رحبت بها ترحيب كبير
...
ف مقهى الفنجان
ستضفتها
المقعد ليها سويت
و قلت ليها:
تفضلي.
شكراتني على لطفي
قبالتها جلست
شفت فيها تبسمات
بديها مسكت
حنات راسها
مني حشمات
قلت:
هزي راسك
فيا شوفي،
آش حابة تشربي؟
يا اللي كويتي قلبي.
شي كاس تلعصير (panache)
قالتها بحشمة
النادل حضر
الطلب لبى
الطاابلة أثث بالمشروب
شكرتو و نصارف
مجال لحديث
قدامنا ولى مفتوح
...
بادرت بكلام
تغزلت بزينها
إحساسها النبيل تجاهي
نشكر و نمدح
وطلبت منها
حتى هي تتكلم
ساكتة ما تبقاش
تخرج من دواير الصمت
على حبها لي تعبر
كيف قالت ليلة البارح
مني ما تبقاش خاجلة
الوقت سيف قاطع
ليه نبهتها
عل البوح زعمتها
كيف صبي تايحبو
...
تنهدت تنهيدة عميقة
حرها لامس لخذوذ
دخت أنا لما تكلمات
بصوت رخيم
و قالت:
بإختصار شديد.
أنا تنحبك حب كبير
حب كتماه
ف صدري
نار حارقة
ف قلبي تكدي
إيام هذي
لهيبها
ما بقيت قادرة نتحمل
وأنت عني بعيد
بادرت أنا
ولعندك جيت
بعدما صبري نفد
خفت نار حبك تخمد
جمرها رماد إصير
نعض صبع الندم عليه
فيا ثيق
إلا قلت:
أنت أول إنسان
الوجدان إخفق ليه
وسيم الروح
خفيف الظل
سكنتي كياني
من أول يوم
شفتك فيه
سباتني شباك الوجد
ما تصورش شحال
أنا سعيدة بوجودك جنبي
بارك عليك
و لا نزيدك؟
شهد كلامي
سؤال طرحات
...
كلامها معسول
إدووخ لعقول
إذووب لقلوب
بساط الريح
أنا فوقو راكب
سافر بيا و جال
من تحتي تمنيت ما تسحبو
قلت لها:
زيدي كملي
مسرور أنا بيك
نشوان بخمر عينيك
...
مدات أديها للكاس
ريقها تريد ترطب
رشفات منو رشفة
كأنها باستو
تمنيت نكون
مكان الكاس
تبوسني شفايفها
...
تابعات القول
و قالت:
ماشي حرام
البنت بحبها
لحبيبها تصارح
شرط إلا كان
إنسان لطيف بحالك
تيملك إحساس رهيف
إحب الخير
قلبو بيض حليب
ما إحقد على حد
متخلق
كل كلمة عندو بحساب
ولد الأصل
شريف عفيف
عزيز النفس
ما متكبر
شيامو التواضع
البشاشة ما تفارقو
و زيد و زيد
...
كانت بتكمل لوصاف
خفت نخليها و نزيد
شرت لها باركة تحبس
وقلت:
يكفي ما سمعت
من مديح
خطابك وصل
فين كنت علي
شحال هذي؟
نوعدك يا بنت الناس
حبك ليا ما نفرط فيه
وعد مني صادق
أنت طول لعمر
رفيق الطريق
عش صغير
نبي ليك
بالحب و السعادة
عامر
عصافير الكنار
زقازيق تملؤ
حيطة بيك
رفرف أنا فوقو
...
دموع الفرحة
من عينيها نزلات
مديت لها
أنا منديل
مسحات دمعتين
قبلتها فوق الجبين
عانقتها لحضاني ضميتها
...
المقهى غادرنا
فوق الرصيف مشينا
بدراعي متمسكة
الضواو شاعلة تسطع
...
هزيت عيني لسما
نشوف واش القمر
باقي ف مكانو
كتشفت
قمر أخر
معاي..
غ
ا
د
ي.