احْلْلْ عقدة من لساني تكون لي الكاينة نبان.
اَية جات لي فبالي مدكورةفي اَلقــراَن.
سماك انتَ رفعتيها ووضعتي لنا الميزان.
هاد الميزان ياسيادي واش مفهوم يافلان.
حيت انافدياري العدل مالو مـكــان.
نبدا ليكم من جاري لّي قطع صِلة لرحام.
ولآ من اهلي واهل داري لّي مايردّو سلام.
ولا من صحبي اوكاشف اسراري ليفجّر فِيّ لغام
انا الّي فخباري اولّي جا فلإسلام
هوّلا ضر لا ضراري الإسلام جا لدوام
لفقير مسكين راه قاري لكِن مالوقيام
سير حْفْرْ لحفاري ولا كون غير خدّام
ولد لوزير لّي فباري جامعاه لعلام
إلى رجع لدياري شهريةُ بكثير لرقام
أنا فلبرد اولمحاني هوّ فديور الرّخام
منامُ فريشْ النعام وطعام غير بلحمام
شتّانَ بينِ وبينو هوَّ مسقي بلحرام
إلا ترْفَّهْ فالدّنيا فلآخرة يكون لو كلام
لِّي عند ربِّي مايضيع واخّى يطولو عوام
غير ثريّْت يا لمقهور وسمَعْ هادْ لكلام
غدَّا قدَّام العادل تاخد حقّْك بتْمامْ
والطَّاغي فالدنيا,فالنَّار كتاب لو الدوام
وخَّى كانت لي أُمنيّة كلنا نفوزُ فْلْختام
ربِّي فاصْل فلْقضيّة ونطق لينا بلحكام
صحاب الدنيا والطغِيّة ينزل لهُم لعْلاَم
صحاب لاخْرة ورضِيَّة مرفوعينْ لبْهام
هاذي قصيدةوتوصِيّة وتنوير لأْنــــــام
أنا عملتْ ماعليّ ونتا عليك التّخمام.
زَجَلْ:ياسين الجهوري