شفت مريم قبل الغروب
ركبت بلا سبة الريح
سرجت لخيول كدوب
حسبت عودي صحيح
ما يخوني يوم
ولا يطيح
ولا يطير مع الريح
ملي حكمت سرجو مليح
عودي اللي كان
حتى لوقت قريب صحيح
لقيتو معطوب
على امرو مغلوب
الري منو مسلوب
مكتوبك اعودي مكتوب
يا مخيبو مكتوب
شحال قدك اراسي
تتعدب وتقاسي
ثبحت وتقلب
مريم اليوم
لبست جلد ثعلب
ما بقات كيف ما فات
تسول عليك وتقلب
نفديه بعمري
اللي يعرف علاش
مني بدات تهرب
انا في الشرق نخيط
وهي في الغرب
حادكة في المقص
كنت نقدر نقبل
لو بغات
على ظهري تركب
نفرش طريقها بالورد
بدموعي نبردها
الى كان الصهد
بدقات قلبي ندفيها
الى جاها البرد
نبعد عليها عيون بنادم
عين كل حاسد
مريم الي بالحب
هزيت راسها لفوق
داقت معايا الحب الوان
هجرت ماشاورت
ما حست بقلبي
مادرات كيف عامل حالو
من يوم هجرو غزالو
ما كواها الهوى
كيف كواني
ما حرقها
كيف حرقني الشوق
هي ضاحكة مرتاحة
وانا تايه شارد
بلا عقل تقادى صبري
بدموعي مخنوق
الوقت في ايدي
غادي ويضيق
طريق ترميني لطريق
و حريق يطفا
يشعل وراه الف حريق
وانا في بحر الهوى
على غفلة لقيتني غريق
