يا ربي رحم حبيب اللطيفة
المجدوب السالك
طريق بعيدة
اللي ما صاب ونيس
من غير قصيدة
بها ولى مسكون ومقبوض
وفدواخلو كبرات الهيبة
بسيط فحالو
صابر على جروحو
والسر شيمة مغروسة فيه
وما يعلم مواجع روحو
غير سيدي ربي العالم به
مجرد من قيود النفس وهواها
ونار المعنى شاعلة فيه
ما تخمد وتركع لماها
حتى يودي اللي عليه
***
مجدوب الغيوان
جدبو الحرف لحضرتو
بلا تكليف
وبجدبتو يصيد المعاني
فالشتا والصيف
من كاس الغيوان
سكرنا زين الخالة
وبطبيلاتو جدبنا جدبة
واشمن جدبة
عمرها ما تسالى
من حوض النعناع
متع الاسماع
وبيه سقانا
حصدنا ودرسنا
ودرينا المعاني
طول قامة
ربي يسقيه
من حوض النبي
سيدنا محمد زين العمامة
ما بين جبال الهمام
مسافر غايب
والغايب حجتو معه
يبات الليل ومطال
مخمور ونشوان
واللي شافو على حالو
داز وخلاه
ويلا صحى وحضر
ما كاين غير هاك
وارى فالمعاني
واللبيب يفرش غطاه
يجمع ويعطي لراسو
ويدي لمو وباه
معاني فيقات من كان نايم
والشاهد الله
ناضوا ليها قلوب المحنة
ونعسوا قلوب البهايم
دوك عديان الله
***
مجدوب الغيوان
رفيك الموال
وخى فناه الهم
وصاڭو ريح خبيت
بقى حرفو غادي جاي
فكل دار وبيت
يجدب اللي ما يجدب
وخى تكون الجدبة
حرام عليه
بشهادة الناس
يردها ويطلب السماحة
ويحب الراس
***
من عندو محبوب عازو
يحطوا فعينيه ما يبريه
وأنا محبوبي
شيخ المعاني بالاشارة
عيطاتو لحنينة
وصرخاتو لحزينة
مغروسة فعماقي
وكل مريد غيواني
مخمور بكاس المعاني
مجدوب الغيوان
فدواخلو حي وباقي
***
وهداك راااااااااااه راه راه
ضربوه يستهل الضرب
والطريحة معمول فيها
يحسب لو المجدوب مجنون
وفالطرقان
يظل ويبات يبرح بيها
مجدوم الله يستر
خصو يداوى
ولى يترمى فخلا
ما يتعاشر ما يتخاوى
إني ولي نادم على كلامو
ولى يتعمى ويبقى تما
ويموت بجدامو
الجنون كلام
والجدب كلام
وعلى من تخلط العرام
يسول ويسال المجرب
اللي داق الكاس
لا يسول الطبيب
اللي كال الجدب هبال
ما فيها مقال
وتبعوه الناس
***
وتبقى الغيوان
نخلة صامدة في وجه الريح
بجهد ربي عمرها ما طيح
معانيها ترزاوة
زيدها مضغة
تزيدك حلاوة
جريدها بو ظل مديد
وجمارها شحال لديد
فرخات شلى مجادب
كولهم عسل
من شربو يداوى
بالمعاني
داروا من الجبل طريق
والله يرحم فيهم اللي ماتو
فعوام السمطة والضيق
فيها الجمر قايم برجيلاتو
6 فبراير 2010 مكناسة الزيتون
