من روائع ناس الغيوان الشهيرة
مهمومة
مهمومـــــة يـــا خيــي مهمــــومـــة
مهمومـــــة هـاذ الـدنـيـا مهمــــومـــة
فيهــا النفــوس ولات مضيـــومــــــــة
ولـــــى بنــــادم عبــــاد الــلُّومـَــــــــة
المسكين ف همومه ساير يْلاَلــِـــــــي
عايــم ف لفقايــص عومـة محمومـــة
شـــي مفتــون بمالــه سايــر يلالـــــي
لايـــح الرّْزَانْ ف قهــــاوي محرومــة
هايــــم ب لقصايـــر وليـــلات تلالـــي
الخرفان مدبوحة والبنات مغرومــــــة
لا حرمـــة بقــــات لا ديــن لاعبـــــادة
خرجت الشهادة من گلوب معلومــــــة
كيســـــان مكبوبـــة والخمر الغالـــــي
حَيَّانـِــي آش دَّانــَا لفعايـــل مذمومـــة
عمرو لحباسات ب طفال مهمومــــــة
ماتــو الرجـــال ب رسايل ملغـــومـــة
عمرو لسواق ب ردايــــل الفـَــــانِـــي
تبنات لبيوت ب فحايش مسمومـــــــة
نْوّْح ْيا غراب هاد العالم مســـالـــــــي
من زمان گالو مات والنوايح مقيومـة
لا شورى بقات كل افواه مزمومـــــــة
خويا ويد الطاغي عل لوجاه مرسومة
