الكلام... ...
بسم الله نــجول فرحــبة الكــلام
وقول الفحول موصــول بالاصــول
يالي بالقول ينط ويــزعرط دمــدام
يكوكط وغير جـيب يا فم وكــــول
الكلام حــروفو ذر تســطع فـمقام
وافي معافــي بالــدال والمــدلول
ابدع وخلي الكـلام يرتع بين المــرام
جانس الحرف يكون كامـــل مكمول
لا تنكع قول وتردو ولــد الحــرام
خرجو من الزحام.حرر الصورة وجول
يا ملون الكلام بنيلة كطران.لغاك ركام
براني دخيل علينا .تعبيرو مشلـــول
ما نحتاج ما نتحوج نبدل معنـى الكلام
والضاد محيـط يفيض حامــل بسيول
الكلام ذر حر يبـهر والــــمتعة فيه
بوح طيبو يفوح وبيــه تندمل الجروح
دوا للروح ادب وسـلوك ما يطوع لسفيه
ما يشعر بيه.جبــحو يصــفر مبحوح
يلا تريد نشوة اللـغا صغى لمـــعانيه
خود على اهلو وتعـالى لمســيد البوح
الكلام هو. يا لـي يتلوا فالكــوة ويتية
يغرق القصيدة فغيس طـوفان نــوح
غليتوه وقطعتو لرحام بالاحكــام عليه
من الوريد طرحــتوه مذبــــوح
باب الكلام ساب. وتحل على مصرعيه
طيب ريحو نز منو خــــنز يفوح
عاد بلا معنى ومن والا يتجرا علــيه
كان راكب منابر القمة وتواطا مطروح
كاين من كال لغاه.وعدو فتوة يفـــتيه
بالله انتن من ريح وراه.اخ من حــديثو
ولي زاغ باقي شنبور كيف نديـرو فيه
فناه لغرور.كيف الحوت يقلـــيه زيتو
يالي يريد يكول كــلام ويعانــد بيه
سال شـيخ ليه بــاع وداع صــيتو
من شاخ بلا شيخ كيتو والغدة تفـــنيه
جبحو خاوي ما مساوي مشيت وخـليتو
كاين لي سداه متين تبارك الله عليـــه
لغاه يبرد اللهفة يروي حقلي ويغيـــتو
غارو منو عداه وما يسواه لي يعــاديه
علاه موكة تغرد ولا الجوج كيف الميستو
احشم يالي يردم الكلام فمطامر الغيــس
الكلام شعر.حر يطير يبلغ السـلام فبريتو
من ديوان مشموم بوح الحال
