عْلاتْ عْلام الظلّام
وتحمّرتْ راية السلام
بِها طبخو شلّا كلام
وفْ جمرهم لبْسوها اللجام
ياك الجمر ما يتطفى غير ب ْالما
يا للي العمش حسن لّو من العمى
نهار على نهار يتزاد العمش
ولا حد فينا باقي يرمّش
العين واسعة أو مغمضة
قشرة الحنظل ديما حامضة
يا ساكت فينا على حرقة كبدو
ويا راضي فينا على مْلاحتْ جلدو
ليك ولينا نصْبو شلّا شراك
ولّينا لعبة من هذا لْ ذاك
صوتنا العزيز عليه يتقارعو
وذاك الصوت المبحوح لا حد سامعو
كيف البارح كيف اليوم
ديما مقموع ومضيوم
دربالة ولا حرير الذل
لا بد ياخويا من حل
بيد فْ يد نحطمو الجهل
ونرسمو دروجنا ل الجبل
لازم ياخويا من حل
لابد ياخّوتي من حل.[/center]
[/center]
