اللي فيا يكفى
*****************
راه اللي فيا يكفى
الهضرة قدامي
و انا احسبتها ورايا
والا بغيتي تعرف لحرامي
خدم لمراية
قبل ما تعطيهم بالكَفى
********
راه اللي فيا يكفى
فتحوا طرقان
وقطعوا ويدان
ونا مكَفظ جلايلي
نتسنى فالمـا يدفى
*************
راه اللي فيا يكفى
حسبوا حسابات
من بعد ما هلل لهلال
قالوا لخيرات جاية
من ذاك الشلال
واش حرام ولا حلال....
مازال ربي ما آعْفى
تنسناه حتى الحال يصفى
*******
راه اللي فيا يكفى
شي جْرات وشي جَارات
قدام ساروت الربح كرات
الغابة بعودها تكدات
اسبابها عين النار تفسدات
وانا
مازال نقي طريقي من الشوك
هذا حال الغادي بالحفا
*******
راه اللي فيا يكفى
والا بينوا ليك راس المال
وتقول دابا يهنى البال
يحفروا عليك من تحت باش تكال
وانا مازال نحقق
واش هذاك وجه
ولا عاطيني بالكفا
********
راه اللي فيا يكفى
ديروني كيف الفاس
حفروا بيا لمقابر
وطرزوا بيا لكفون
والا تكسرت
دكوني في الأرض عكاز
وسيروا بيا
على حد ابصار العيون
********
راه اللي فيا يكفى
والا كنت مريض
الله يجيب ليا الشفا
والا ما تشافيت
بركة عليا
راه اللي فيا
يكفى.......
بقلم:
المختار بن دغة
13-10-2011
