مازال فيا مايهرق..
مازالت حلمتي ماقالتلي نعم
مازال كوني ماشرق
مازال الظلام ديال الف عام
عفاك ياحلمتي
داخلت عليك بدمعات
هرقيني من ورا السكات
هضره..
عفاك
حطيني حداك
نظره مخرجه عينيها فعروق السؤال
تشوف وتشاف
زاطمه برجليها جهة الثقال
تاتقرا المكتوب عل لكتاف
عفاك ياحلمتي نزليني
حطيني ف نص الطريق
رني عييت
نفتح عيني فيا نفيق ياريت..
نفلت من اللي فات
نسلت من الضيق
شهيق/ رحيق
لذاك النحلات
خليني اوشام ف وجه الدوام
احلام عايشه ف ليام
انسام
طايره روح/دايره ريح
دافع غمامه...
فين ما بغات تطيع تطيح
خلطي مايا مع ماك
بلقياس
وفتحي فدواخلي لانفاس
وكشفي عل لمخبي ف هذ الراس
عفاك خرجي حلمه من نقطيع لياس
سيلي ........سيلي
وروحي معاك
والواد اللي داني داك
شرقي ف الظلمة
شعلي طريق لعما
كني بلورات الماس..
فضحي النفاق
......
....
...
.زيني كوني بعقيقه
خليني نلمع ببريقه
عل رقبات العشاق
كنيني ف غدا
لذه
للجيعان
غذا عامر يدام
كنيني سترللعريان
غزليني ودرزيني
وفصليني عل اكتاف ليام
روايات
حكي للجايين حكايات
ربطي النهايات مع البدايات
كني وكني
لا تسمع واسمع
لاتهضر واهضر
لاتبكي وابكي
لاتضهر وضهر
لا تشوف وشوف
كني معنى للخوف
ولا تخاف
فضحي فيا اللي مايتشاف
نزليني من فوق هذ لكتاف
حكي عل غدا ف البارح
وعل البارح ف غدا
حطيني قدامي وريني منين نبدا
تسائلي فكري وطرحيني سؤال
عل الحال
وتسناي الجواب من فم المحال
عمري بيا الخوا ف ليام
ف الصهد نشفع
ف الظلمه نلمع
ف البرد ننفع
اعطيني للجيعان ..حتى يشبع
جيبيني فجر جديد
جيبيني فرحة عيد
نبان
عل وجه الصبيان
جيبيني ستر
فاضح لعرى
اشريني وبيعني بلا بيع بلاشرى
طلعيني ف سمايا قمر
ونوبي علي من ورا لقبر
يلا غبت انت حضر
ويلا سكت ف بلاصتي هضر
قلي اش ضاع من لحلام
ويلا جاوبوك
وشمي جوابهم عل الدوام
ف خدود لعمر
وتبقى سياله
مكتوبه كلمه
تكون عنواني حروفها جمر
تدوي بلساني
وتشهد عل ضهر لقبر...
المفضل الياموني
