سرب لحلام

سرب لحلام طار وعلا بحال لحمام
تلف سوارو
بنفس السرعة باش طار وعلا
نزل وادلا
هذا حال الدنيا
أحلام تفوت
وأحلام تفرخ موت
أحلام تدبل ف سكوت
كان ظلها ظليل شجرة توت
وحلام بح منها الصوت
تعاني ف سكوت
تأملت حلامي وتألمت
قلت :
باش نحقق حلام خرى
خصني عمر جديد عندو ألف يد
مافيه نار مافيه حديد
لملمت حلامي ومشيت
من خوفي عليها كريت رموشي حمال
حملت سرب حلامي وتسنيت
تسنيت رجوع الأمل حتى عييت
نورت ضلوعي بكل لوان الطيف
سكنت فيها سرب لحلام ضيف
خبيتو بعيد من كل حيف
لكن الظلم يدو طويلة
ماتفرق بين غازي و ضيف
وسرب حلامي عنيد
تشم ريحت عنادو من بعيد
توسدتو
كتمت صوتو
لكنو مل القيد
عياو جنابو من رقود
سرب حلامي كتم نفاسي
تسلل لشوارع الحياة ف نعاسي
لجم لساني ما بين ضراسي
خرج وشم عبق لوجود
صبحت حريتومالها حدود
حاول يحلق ويطير
لكن كيف يدير؟
قصوا جناحو
كبحو جماحو
صادرومنو حق التعبير
سمعوه من لمنقي خيارو
قالوا :حلمك ماشي قياسك
مد رجليك على قد لحافك
بكيت سرب حلامي
دبحو عليه ,سماوه من جديد
سماوه سرب ليام
كنت أنا كبش الفدا مابين يديه
و ماشي خسارة فيه