دراز لحلام

موضوع: دراز لحلام الأربعاء أبريل 11, 2012 8:23 pm

[b]درّازْ لَحلامْ

بينْ صْباعْ لِيلِي
تخَبْلتْ خيوطْ السْدا
الدرّازْ ما قدرْ
ينسج
قْبلْ طْلوعْ لفجرْ
يْفك الخبْلة

فْ صباحْ
جْمعتْ خيوطْ شَمْس
فْ عيوني
شْربْت منها
قدْ عَشقِي
جْرِيتْ سَاقية
بالضُّو
فضْت لنْهارِي
بشُوقِي
هْدِيتْ راسِي لْمُغزلْ
يغزل لثَام لْ حُورِيَة
تْخيّلتها عرْيَانة
تَجْري
بِين سْوايع لفجرْ
تْقلّب
فِين تخْزن زِينْها
قبلْ ما النهارْ
يْطلْ
ويفْضحْ السّرْ

حكِّيت عيني
هجَّجت ظلامْ
مْعشَّش فْ جْفونِي
دْخلْ النهارْنابت من الدّم
مْورّق يدّين مْشابْكة
تجْني
من الشمسْ
صْفا و قوّة
من النجوم والكُمرة
عشيرْ للسَّفرة

تْمعَّنتْ فْ وْجوهْ ليّام
حتّى نْهارْ ما يَشبَهْ نْهارْ
الأرض راحلة كل رمشة تخميمة
من عَفطة لْ عَفطة
بنآدم ...
شي يَاكلُه الترابْ
يتفرّق فْ النبات
من كلْ صْنافْ
شي عادْ تُّولدْ
ياكُلْ خيراتْ
من رمادْ
امُّه و بّاهْ

[/b]

» دراز لحلام
» سرب لحلام