حلاوت الليل.....
آه يا ليل....شحال طويل....
بْصَمْتَك يا ليل.!
تَتْهِيّْج...لْخِيل....
وتْشْفي...لْعْليل....
وتْرْتّْح...لْبْخيل....
وتْخْوّْف...لْهْبيل....
وتْبْكِّيي...دْليل....
وتَتْوْنّْس لْخْليل....
أمَّا بْسْحْرْك لْمْكْلْكْم..!
القلب...يْتْرْمّْم....
و لْسان...يْتْكلّْم....
و شْفا...تْبْسّْم....
و لْوْلْهان...يْتْغْرْم....
و لْوْحْداني...يْتْأْلّْم....
والفنان...يْتْلْهْم....
وْبْجَمالْك لْمْرْبَّع..!
السْما...تْسْطَع....
و بْضْلامْها...تْخْدَع....
و بْنْجومْها...تْلْمَع....
و بْقَمَرْها...تْوْلَع....
و بْضُوْها...تْبْدَع ....
و بْنْداها...تْدْمَع....
ومْعاك يا ليل..!
تْحْلاَ...الجلسة لْمْقَعْدة....
و الزوهور...لْمْوْرّْدة....
و الشجر...لْمْجْرّْدة
و شْهيوات...بْالزّْرْدة....
و الأفْراح...لْمْتْخْلّْدة....
و الأصوات...لْمْتْوْحدة....
و لْنّْاس يا ليل..؟
رَحْمة..ولاَّ..نْقْمة ..؟
لِلْأَصيل...رحمة....
و لَلْقانْع...نعمة....
و لَلْعالم...حكمة....
و لْرّْهيف...كلمة....
و لْحْبييب...نغمة....
و لَلْعاشْق...هْمَّة....
أَمَّا..لِلْمْبْلي...نْقْمة....
و لْمْسْكِين...أْزْمة....
و لْجَّاهل...زْحْمة....
و لْبْزْناس...خْدْمة....
و لْلْمْزطول...صْدْمة....
و لْتَّايْه...كْرْمَة....
أمَّا..لِلْغَرام...فَيا..سَلاَم....!
العاشق الولهان....يروي بحنان..
و المُعْجَب بْتّْمْر....يْسْكْربْلا خْمْر..
و المولوع بلغرام....يْتْشّْد بْلا لْجام..
والتْقيل الرْزين....يْتْكْلّْم بْلْعَيْنين..
و لْخْفيف الضْرِيف....يْطْلَع..بْلا..كِيف..
و مُولْ الشُكَّارة....مَكَايْن..غِير..هاك..وَرا..
آه....شْحال....مْن سْر..مْخْزّْن..يا ليل !
كُون..كان..وْجودْكْ..يْشْفي..لْغْلِيل..كُون..مَابْقَا..لاَ..مْكْر..وَلاَ..دْلِيل...!
من ديوان: ثريا الدموسي
كل الحقوق محفوضة
