النفس لغدّارة
يا نفسي
يا لّي بالسوء أمّارة
سكنتي بين ضلوعي
شاركتيني فرحي
ودموعي
وليوم صبحتي غدّارة
شكيتي وبكيتي
وعلّمتك الصبر
جعتي وعطشتي
وعلمتك لقناعة
وليوم ملّي شبعتي
صبحتي طمّاعة
يا نفسي
يا لمغيارة
رضاي بلّي عطاك الله
لا تطمعي
حتى تولّي لغيرك عبارة
يا نفسي
عليك بالصبر
لّي بدا صغير
غدّا يكبر
ولّي غرّو الطمع
لازم يخسر
يا نفسي
عليك بلقناعة
لقناعة كنز
يوصّل لطريق لعزّ
والطمع طريقو طويل
كيف لحبل
ومصيرو يوصّل لدّل
يا نفسي
يا لغدّارة
طريق الربح نورّيك
وتجرّيني لطريق لخسارة
استغفري ربّك
طلبيه يهديك
وبخيرو يعوّض ليك
ومن فضلو يعطيك
ويجعلك للغير منارة
قبل ما يفوت لفوت
وتولّي لعيشة فيك
خســــــــــارة
ــ سعاد فائز ــ
