محمد حلوبي
عدد الرسائل : 12
العمر : 62
Localisation : آسفي
تاريخ التسجيل : 31/07/2012
 | | موضوع: حول حرب الطرقات : طويل و ما ليه خيال الخميس سبتمبر 20, 2012 4:19 pm | |
|
طويل طويل و
ما ليه خيال
كالوا حرب
الطرقات
جاتني اكثر
،
دمايات
تهرقات
تتهدر و
تشرشر ،
ارواح
تحصدات
شحال خوات من
دشر
و مدى عمرات
من قبر.
زادت ف الأرامل
و ليتامى
زادت ف
الدموع
زادت ف الجوع
زادت لوعة ف الضلوع
و اللي تعاق و اللي تفرما... و يا ما.
هاذ الشي
قضاء و لا قدر
زينة ديال
البشر
ك تموت ف كل
نهار
هاذ الشي
أخطر من الخطر.
هاذ الشي ما
كاين حتى ف بلاد
حديدنا ولا
عتاد:
ما يقتل
عديان
جارت ع البلاد ،
يضحي
بالمجان
غير ب اولاد
البلاد .
حتى لين؟
حتى لين غ نبقاوا ساكتين ؟
نكولوا
باراكا
نوقفوا الحركة
نبينوا عيبنا
باش نصلحوه
نزينوا خيبنا
شملنا يتلم
ما يبقاش مسلم يقتل خوه.
شلا طركان مضيقة
للسير مابقات لايقة
حالتها حالة.
و كم من طركان محفرة
و من جنابها مقشرة
وقف انت ، حتى ندوز آنا.
و اللي معوجة و اللي مايلة
و اللي ما بقات فيها طايلة
و اللي مرقعة و اللي مظلامة ،
آرى ما تتهامى.
وفيقوا و عيقوا
و ديروا للسير طريقو
راجل كنتي آو
ولية
كون قد المسؤولية.
و انت يا شيفور
باراكا من التهور
ما تعمي عينين ب فار
ما ترمي ع لاخرين مزرار
الله يرحم باك
ما تخنق اللي وراك
ب دخان و
غبار.
احترم عدد الراكبين
راهم لحم و دم
اللي خصوا يهز أقل من اربعين
مالو ما يحشم
لاش معرم أكثر من ستين
يعلم الله لاش معرضهم.
و انت مول الموطور
ما بقى ليك غيرتكابري
و تزيك زاكي و تدور
احترمهم يحتارموك
قبل ما تدخل تحت شي رموك
و رموكات الرملة
بنادم كدامهم نملة .
شي مداس ديال السياقة
بالسياقة ما عندهم علاقة
زيد القهوة فوق خلاصك
يعطوك البيرمي و دبر راسك
بزاف علينا السير
من غير ادهن السير يسير ،
الرشوة باقا عنوة
من قهيوة للشوا
و صعيب نسوقوا حتى الحمير.
راه غير الجحش ك يتسيس
قبل ما يتبردع أو يتحلس
و تكول ليه آرى سير
هاذي رسالة
هاذي أمانة
أحسن مدونة
كل واحد منا
يتنازل ع الأنا
و كون درنا رادار ل داخل
ما نوصلوش هاذ المواصل
محمد حلوبي - آسفي
| |
|
