ملي كان زمان
ملي كان زمان
كانت يامو صافية
الكلمة غدير
مياهو دافية
حبات
وجرات
فكفوف الساكية
دبت
فعروق التفاحة
والدالية
نضجت
وعطات
سطور غالية
فيها حكمة
ونغمة من القلب جاية
فيها معنى
تامر به غانية
ملي كان زمان
كانت حنة
تعنقني
أو فاحضانها تدفني
تحاجي
ونفك
نحصل تعاوني
تحكي
بلا قراية
حجاية بها ترويني
ملي كان زمان
كنا عايشين
ما سايقين خبار
تعلمنا السكات
وتوزعات علينا لفكار
القراية بالسلف
ما تعرف تختار
كانت مكتوبة
غير للناس الأخيار
قراو وتعلمو
فعيونا ويدينا تحكموا
رسمو يامنا
بلوان الهم
ما بقاو حشموا
ملي كان زمان
سافر بنا الحلم
فرحاب السلم
ورسمنا حكايتنا
بلون الصبا
كتبناها فالارض
وعل الشجر
والحر جمر
وزوقناها بالصبر
م كد زمانا
يحكي عل لقهر
وحن للزمان الظهر
ما بقات يامنا تفكر
ضاعت في وسط يام
كلها خلا وغدر
والساعة وقفات
الموري تلف النظر
والوقت غدر
بوسخ الدنيا عمر
عطارنا ما حشم
مزال يدور بحمارو
من دوار لدوار
يوزع فشرارو
ويسقي صبيانا
ليعة التفكار
والفقسة تقطع فينا
لاصقة هي والعار
ليوم راجعت كثير
لحكاية
وعرفت باللي حكايتي
ترسمت فالحجاية
مسكينة حنة
كانت فاهمة
والكية فالقلب بكاية
ما كان لازم نعرف
وأنا صغير
باللي الحلم تدبير
وهكدا كان زمان
او مزال عطارنا ما حشم
امت ليام تتسكم
ونزور حنة فقبرها
ونحكيلها ونكول
الكية اللي فقلبك
زالت من قلبي
ونهارنا طلع
وتفسخت عقدة الوجع
مش ما رجع
بغيت ننسى
ويتحقق الحلم
حلمي ضاع نعاسو
جاه حلم كيخلع
سرق كل جميل فالحلم
وخل الليل مشطون
منين يجيب حلم
كيف اللي كان
مكنون فعهد السلم
وعطارنا ما حشم
رويتلو لحكاية يمكن يفهم
الصبيان اللي كانو ما بقاو
والفم اللي تلجم سنين
اليوم تكلم
كلمة فاتت لفام
كلمة فاتت لكلا م
كلمة تحدات
دروع الخوف
والشوق ملهوف
تتحرر لقلوب
من حبسة لفكار
اللي توزعت علينا
واحنا صغار
ياك أكلبي
ونفرح انا وصحبي
ونديرو ا لمان
فشرع هاد الزمان
وتعود لحكاية
بها تروى عيون الصبيان
يطيب الخاطر
والحال يزيان
يطيب الخاطر ....والحال يزيان ...
عبد العالي الوالي ميسور 2013/04/04
