الوحش ...
توحشت لحروف
فديك البسمة
جاية ترسم الحلم
فقلب القصيدة
...
توحشت النظرة
من دوك العيون
تغرس الفرحة
فحس الوقت
تجي سكدة للحرف
...
توحشت راسي
ما لقاني ملي بغاني
ما لقيتو وقت الشدة
غبر نحاسو فالوقت
...
توحشت الكلمة
اللي فالصدق هايمة
تعبر زمانا بالحق
يجي الحلم ينور القلوب
...
توحشت زمان
ياك العشق كان فاللمة
كانت الخاوة مراح للقلوب
تجري فيه وتتظلل بالمحبة
...
توحشت نشوف شي وجوه
كتبت فدفاتر الولف
كلام كل يوم عليه نْرَكّب
نروي الوحش اللي بي
...
توحشت ليام
ديك ليام اللي رسمنها
بجوج تحت الدالية
وحروف الساكية تجري بدموع
تسقي عشق دبال فطريق المحال
...
توحشت نحلم
نغلب الليل وظلمتو
نبيض السعد بنجماتو
ونكون حداك باش نلقاك ديما
بجواري فالرخ والشدة
...
توحشت كلشي
وانت كثر
شمعة يدوب فيها الهم
بسمة تنور طلة الصباح
وعلي تنشر جناحها ندف
توحشت كلشي وانت كثر
عبدالعالي 2013/12/15
