[rtl][size=48]قوم الاشرار و حكمة الواحد الجبار
[/size][/rtl]
[rtl]عمات ليكم لبصيرة و لبصر
و بنتكم ما عرفت معاكم زهر
ما صفيتوا ماكم يا قلوب الحجر
شيمتكم الجوع و الغدر
قساوة قلوبكم ما عرفت ليها مثيل اكثر
و انا على ليعة فراقها نقول الله اكبر
انا قلبي على مراتي مازال عليل
و انا قلبي على فراقها همو ثقيل
بان عياركم
يا قوم المعمية
لا اسم لا كنية
شيمتكم الجوع و النوع
و لبكاء بلا دموع
باقي ماها فوق الغسال
بعدما دمها من صدرها سال
بديتوا تهبشوا على الورث
فالساعة و الحال
قلوبكم كحلة من هذا شحال
انتما جنون و لا مجوس
يخ من هاد الكنوس
غراوكم الشطايط و الفلوس
حسبتوها بقرة حلوب[/rtl]
[rtl]و ما جنيتوا منها غير الذنوب
بزولة لمرار
حلبتوها بالعار
خلات الصلايا و لبدة
و ما دعيتوا ليها بالرحمة
ما دعيتوا ليها بالغفران
همكم هو الثوب و الكتان
كليتوا الطعام شلا
و تعيشوا بلا دين بلا ملة
و حاشى واش واحد منكم انسان
ذياب ولابسا ثياب
شدتكم الرعدة و بوهزهاز
طمعتوا حتى فالطناجر و المهراز
الباز يولد الباز
و الدوم يولد الغاز
و اللي عماه الطمع
ما يكودو عكاز
بان عياركم
و ما بقى يفيدكم بهتان
ضر ساعة
يخلي كاعة
الام و الخوت صبحوا عديان
و اليوم تفضح السر المكنون
ما ينفع لا مال و لا بنون
و التراب المقبرة
يكون ف ارض التيرس
او ف ارض البور
و الدنيا مادامت
لفرعون و لا قارون[/rtl]
[rtl]ما صفيتوا زرعكم من النخالة
غدا تلبسوا حلاسة
و تقلبوا على الدربالة[/rtl]
[rtl]ذياب ولابسا ثياب
و الكفن مافيه جياب
الفلك يدور
و السوايع بدالة.[/rtl]
[rtl]محمد ناجي[/rtl]
