[size=29][/size]
شحال فالساعة
قال الراجل
للشاب العاطل
جاوبو ..
اسيدي ما عندي ساعة
عايش حياتي ساعة بساعة
الافق مسدود
والامل مفقود
وحيلي مهدود
من قبل كانت عندي ساعة
كنت منضبط ووقتي مضبوط
كنت عايش وقتي بالدقيقة والساعة
كنت تلميذ يجد ويكد
صبحت طالب نتائج متفوقة يحصد
تخرجت وحزت دبلوم كبير
فرحو حبابي كبير وصغير
زفوني بالغيطة والبندير
قالو لي ..
افرح وسعد
غدا تصبح وزير
من هبالي صدقتهم
تخيلت نفسي مسؤول كبير
انا نآمر والغير عليه بالطاعة
دازت ايام وطال الزمان
سولوني الناس..
فاين خدام اشنو كتدير
انا عاطل هاد الساعة
ما نا وزير ما نا مدير
ما نا شاوش فجماعة
طلباتي رفضوها بدون تبرير
ما خدموني فوزين
ما قبلوني فزراعة
فكرت نهاجر
كيف نعمل وبا فقير
قلت نحرك
عييت من التفكير
جمعت رحيلي
ودعت خليلي
قاومت الحنين وقصدت البحر
قبل ما نغامر
بديت نفكر
طاح فبالي
با ومي وما بلغو من العمر
وجبرت نفسي
علي فراق الحباب ما نقدر
رحعت لبيتي
نواسي راسي بالصبر
وقررت..
انا بلادي ما نهجر
فيها نكد ونجد
فيها بضفاري نحفر الصخر
وما نكون عبد لحد
نكون سيد راسي
ويدي للغير ما تتمد
وخا نموت بالمجاعة
والان خليني فحالي
بدل ساعة بساعة
راني ما عندي ساعة
من قبل كانت عندي ساعة
الدار البيضاء في 9يناير2008
